Shillong, Naiwieng 24 : U Symbud Myntri Rangbah ka Jylla ba khmih ia ka Tnad District Council Affairs (DCA) Bah Prestone Tynsong ha ka sngi Thohdieng ula pyntip ba ka Sorkar Jylla kala bthah ia ki Autonomous District Council (ADC) ha Ri-lum Khasi bad Jaintia ba kin pyndep noh ia ka jingphiah thymmai ia ki constituency kham kloi kat kaba lah.
Haba iakren bad ki nongthoh khubor, u Bah Prestone ula ong ba dang shen u Lat ka Jylla ula thung ia ki Delimitation Committee jong ki artylli ki ADC – ka Khasi Hills Autonomous District Council (KHADC) bad ka Jaintia Hills Autonomous District Council (JHADC).
“Mynta, kila iaid shaid shaid ha ka jingpynbeit ryntih ia ki constituency. Ka Sorkar Jylla kala bthah ruh ia ki ba kin pynsted noh wut wut khnang ia ka elekshon MDC ban wan, yn pynlong noh na ka bynta ki constituency thymmai ym shuh kiba rim” ula ong.
U Symbud Myntri Rangbah ula ong pat ba kane ka jingphiah constietuency kam mut ba ki seat jong ki artylli ki ADC kin nang bun namar “Kane ka dei ka kam ba hap leh kat kum ka Riti Synshar”.
“Ia mynta hi, ki artylli ki ADC ki kwah ban pynbeit thymmai namar ki don ki constituency kiba heh palat ia ka MLA constituency. Namar kata, ngi la kyntu jur ruh ba kin pyndep noh kham kloi kat kaba lah ia ka kam” ula ong.
Halor ka kam ba iadei bad ki khyrdop beain, u Bah Prestone ula ong ba ka Sorkar Jylla kala dep pynsangeh ia baroh ki khyrdop beain hapoh ka Jylla.
“Ngi la bthah ia ki ADC bad ki DC ba ki dei ban khang khyrdep lut ia kino kino ki khyrdop beain bad ki la leh ruh ia kane” ula ong.
