Shillong, Naiwieng 24: Ka Myntri ka tnat ka koit ka khiah ka Kong M. Ampareen Lyngdoh hynne ka sngi Thohdieng, kala plie paidbah iaka Mawkdok Sub Centre Health & Wellness haka jingdon lang u MLA ka Sohra u Bah Gavin M Mylliem.
Haba kren ha kane ka sngi, ka Kong Ampareen kala ong ba kadei ka thong jong ka Sorkar ban kyntiew iaki lad aijingsumar ha man la ki shnong ki thaw naka bynta ki nongshongshnong.
Ka Kong Ampareen kala ong ba ka Sorkar ka ialeh ban aibor iaki Dorbar Shnong ba kin khmih iaka jingtreikam ki Health Centres. Kala ong ba ka Sorkar ka ialeh ban kyntiew bad pynbha iaki jaka sumar khamtam ki jaka kha khunlung ha baroh 7000 tylli ki shnong.
“Haka por ka khlam Covid-19 ki shnong kila pyni ba ki lah bha ban pynbiang iaki jingdonkam haka liang ka koit ka khiah” la ong ka Kong Ampareen.
Nalor kane ka Myntri ka tnat ka koit ka khiah kala kyntu iaki nong shong shnong ban mih shakhmat ban pynrung kyrteng ialade ban ioh ia ka MHIS Card bad u Number Aadhaar naka bynta ban ioh shibun ki lad jingmyntoi.
Ka Mawkdok Sub Centre Health & Wellness ba dang shu plie thymmai la tei katkum ka rukom Indian Health Service (IHS) Standards Type B model bad kane ka jaka sumar kadei kaba la biang bha naka bynta ban pynkha khunlung bad ia kane ka jaka sumar la ioh jingithuh daka National Health Mission’s Programme.
Kiwei kiba don ha kane ka sngi ki kynthup u Bah P. Tynsong u BDO ka Laikroh Khatarshnong C&RD Block, Dr S.A Lyngdoh, DMHO East Khasi Hills District, u Sordar Shnong Mawkdok, ki Doctor, ki ASHA bad ki nong shong shnong.
