Shillong, Naiwieng 23: Ka long ka jingkmen bad ka jingsngewsarong kaba khraw ia ka jylla Meghalaya hadien ka jinglah ban wanrah ia ka nam ka burom jong kawei ka thei ialehkai pyni dohksah (Bodybuilding) kaba la ioh ban khur ia ka takma rnong na ka rynsan pynidohksah kaba la tip kum ka Joe Weiders Olympia Amateur India 2023 kaba dang shu kut shen ha nongbah Mumbai.
Kane ka thei ialehkai pynidohksah ka dei ka Kong Suzie Basan (43) snem ka rta kaba la shimbynta ha katei ka lympung pynidohksah bad kaba la ioh ban rah syndon ia ka takma rnong.
Ia ka takma Ksiar la iohrah da ka thei ialehkai pynidohksah na ka ri Russia bad ia ka takma rupa la rah na New Delhi, kane ka lympung ialehkai pynidohksah ka dei kaba kut shen ha nongbah Mumbai ha ka 19 tarik u Naiwieng 2023.
Lah ban kdew hangne, ba ka Kong Suzie Basan ka dei ka longkmie kaba ieid ia ka kam ialehkai pynidohksah bad khamtam ka jingialehkai kilan met ka dei ruh ka longkmie kaba la don ar ngut ki khun bad ka trei ruh kum ka nongai jingpyntbit ia ki nongkilan met hapoh ka Gold Gyms ha nongbah Shillong.
Ha ka jingiakren bad kane ka longkmie, ka Kong Suzie Basan, ka la pynpaw ia ka jingkmen kaba khraw ban wanrah ia ka nam ka burom ia ka jylla Meghalaya ban khur ia kane ka takma rupa na katei ka rynsan ialehkai pynidohksah kaba la tip kum ka Joe Weiders Olympia Amateur India 2023 kaba dei ruh ka rynsan iakhun ba la shimbynta ruh da ki thei ialehkai pynidohksah na kylleng ki ri ka pyrthei bad ki jylla jong ka ri India.
“Nga dei kaba sngewtynnad bha ban iashimbynta ha ki kam kilan met bad nga trei kum ka nongai jinghikai hapoh ka Gold Gym Shillong bad ka jingleit iashimbynta sha katei ka rynsan kaba heh ka dei ka jingthrang jong nga hi ban aireng pyrshah ia ki thei kiba don ia ki dohksah batbit na kiwei pat ki ri ka pyrthei, watla nga don shibun ki jingduna ha ka liang ka jingpynbiang ia ka diet hynrei nga kmen pat ba nga la ioh ban khur shwa ia kane ka takma rnong kum ka dak ka jingsdang ban shimbynta sha kiwei pat ki rynsan kiba kham heh”, ong ka Kong Basan.
