Shillong, Naiwieng 22:Ka Sorkar Jylla ha ka sngi Balang kala kyntait ban pdiang ia ka jingdawa jong ki Nongtrei ASHA ban kyntiew ia ka honorarium na ka T.2000 sha ka T.5000 bad rai ha kaban pyntrei kam da ka skhim thymmai bala tip kum ka Community based Health Incentive (CHI) ban weng ia ka jingeh jong ki haba phai shaki jingpynlut pyndep ha ka bailet baiwai bad kiwei kiwei.
Ia kane ka rai la pyntip da ka Myntri ka Koit ka Khiah Kong Ampareen Lyngdoh hadien ka jingialang bad ka kynhun ki Nongialam ka Meghalaya Accredited Social Health Activist Workers Union (MASHAWU).
Haba iakren bad ki nongthoh khubor, ka kong Ampareen kala ong “Ngi la rah (jingtyrwa) hapdeng u Myntri Rangbah ha ka jingialang ba long hynnin ka sngi bad mynta ka sngi bad ngi la rai ban wanrah noh da ka skhim ba thymmai ka ban khmih ia ka jinglut jingsep ki ASHA ha ka por ba ki pynkit ia ki nongpang sha ki jaka sumar. Ngin pyntreikam ia ka Community based Health Incentives (CHI) ban leh eiei halor ka jingdawa jong ki”.
“Kane kan dei ka jingai ba thymmai kaba ngi donkam ban hap ai sha ki ASHA. Kin kynthup ia ka jingpynlut ki ASHA ha ki kam bapher bapher kum ka jingpynkit ia ki nongpang, ka jinglut ki ASHA ha ka leit buh nongpang sha ki jaka sumar, ka jingiarap ia ki ASHA kiba treikam bha bad kiba la lah ban pynduna ia ka jingiap ki Longkmie ba armet/kha khun lem bad ki Khunlung” kala ong.
Haba pynpaw ba ka skhim CHI kan dei kaba pyntreikam lyngba ki shnong, ka kong Ampareen ka ong “Kan iaid ryngkat ryngkat bad ki paralok ba iatreilang ha ka kam, ki ban wanrah jingkylli ha ka Jylla bad na ka bynta ki paidbah ka Jylla”.
Ka Myntri kala pynbna ruh ba yn sa thaw ia ka Committee ha baroh ki District, ki ban khmih ia ki jingeh jong ki nongtrei ASHA.
Ki jaka sumar kiba don ha palat 7000 tylli ki Shnong kila shah ktah jur na ka jingsangeh treikam jong ki nongtrei ASHA ha kine ki 17 sngi balaleit noh, namar ka jingpyrshah ia ka jingleh mynthi ka Sorkar ban kyntiew ia ka honorarium jong ki na ka T.2000 sha ka T.5000.
Halor ka jingdawa, ka Myntri kala ong “Ngi la ong ba lada ki ASHA ki dei ki tnad ba kongsan ha ka jingtreikam, ngin sa iakren bad ki hynrei u don da u pud jong kane ka jingiakren. Arphew bnai mynshuwa, kala don ka jingiakren bad baroh kila biang nadong hadong hynrei arphew bnai hadien, phi la wan iakynduh biang ia ki bad don biang ka jingiakhih. Ngi kwah ban peit ba kum kine kim dei ban jia”.
Haba kdew ia ka Pay Commission haba don ka jingpynkiew tulop ia ki Nongtrei Sorkar, ka Kong Ampareen kala ong “Ka dei ban don ka jingpynshonghok ha man ka por ba phi phah pynkiew jingsiew. Peit ia ki nongtrei Sorkar. Ka pay Commission ha ka Sorkar Meghalaya kam ju jia khah khah hynrei ki briew kila iatreikam beit”.
Haba kyntu ia ki Nongtrei ASHA ba kin ai tang 6 kynta ka por ba laitluid ym man ka sngi, ka Myntri ka ong “Ngi don ki ANM kiba kyrshan ia ngi ha ki Shnong, ngi don ki Mid Level Health Workers, kiba kyrshan ruh ia ngi ha ka jingtreikam. Baroh trei ia la kam, wat pynkit khia ia kine ki ASHA kiba shu trei mon sngewbha”.
Ha kajuh ka por, ka Myntri kala kyntu ia baroh ki nongtrei ASHA ba kin sdang iatrei biang noh ia ka kam naduh lashai ka sngi halor ka nongrim ba ka rukom treikam ka donkam ia ki.
“Wat ailad ia ka Sorkar ba kan shim rai, kaba lah ban ktah ia ka jingshakri jong phi” kala maham.
