Shillong, Naiwieng 21: Ka North Eastern Police Academy (NEPA) hynne ka sngi kala pynlong iaka 52nd Passing Out Parade jong ki 377 ngut ki Pulit na kylleng ki jylla ka thain Shathei Lam Mihngi (NE) kiba la pyndep iaka jingshah hikai pyntbit.
Ki 377 ngut ki Pulit kiba la pyndep iaka jinggshah hikai pyntbit ki kynthup 276 ngut ki shynrang bad 101 ngut ki kynthei kiba la pyndep iaka Basic Course hapoh NEPA naka bynta ka kyrdan Sub Inspector (SI) bad Dy. Superintendent of Police (Dy. SP).
Haba kren ha kane ka sngi u Myntri Rangbah ka Jylla Assam u Himanta Biswa Sarma ula ong ba ka NEPA ka la ioh nam ha baroh kawei ka Ri India namar kadei ka shlem ai jinghikai pyntbit iaki Pulit jong ka thain Shathei Lam Mihngi.
U Himanta ula iathuh ba iaka NEPA la seng daka tnat Ministry of Home Affairs (MHA) bad haduh mynta kala dep ban ai jinghikai ia palat 5000 ngut tam ki Sub Inspector (SI) bad Dy. Superintendent of Police (Dy. SP) na kylleng ka thain.
“Ngi la sakhi mynta ka sngi iaka 52nd Passing out of Parade ha kaba ki Pulit na kylleng ki jylla ka thain Shathei Lam Mihngi kila pyninam iaka ki sap ba ki don bad kiba kila ioh jinghikai ha kane ka shlem ai jinghikai ka NEPA” ong u Himanta.
U Himanta ula kitbok ba kine ki 377 ngut ki Pulit kiba la pyndep iaka jingshah hikai pyntbit haka Basic Course bad ula kyntu iaki ban long ki nongiada iaki duk ki suk bad haka juh ka por ban nym aili iaki briew kiba myllien ha ki kam bymman.
“Nga ai khublei ia u director of NEPA bad ia baroh kiba la shimkhia ban ai jinghikai ba kynsai iaki 377 ngut ki Pulit ba kin lah ban trei iala ka kam kumba la bynshet haki” ula ong.
