Shillong, Naiwieng 21: Ka North Eastern Hill University Students’ Union (NEHUSU) hynne ka sngi kala rai ban thaw da ka Gender Sensitization Committee ka ban shimkhia ban tuklar halor ki kam shah thombor ki kynthei hapoh NEHU.
Haba pyntip ia kane u Finance Secretary ka NEHUSU u samla Mandor Diengdoh ula ong ba ia kane ka Committee la thaw hadien ba la saphriang haki lad pathai khubor haba iadei bad ka jingshah thombor kawei ka kynthei ha u Nantu Das u ba khmih iaka Security bad u Asst Director of Sports jong ka NEHU.
U samla Mandor ula pyntip ba hadien bala eksamin iaka jingujor ka NEHUSU kala shem ba kane kam dei shuh ka sien ba nyngkong ba la kynnoh ba u Nantu Das ula thmu ban thombor iaki kynthei hynrei kine ki kam sniew kim paw namar ba ki lehrain ban pyntip paidbah.
Ula kynnoh ba hadien bala mih ka jingkynnoh, kala don ruh ka jingkynnoh ba ki Research Scholars halor ki kam kynshlein u Nantu Das.
Haba kynnoh baka NEHUSU kala ioh pdiang shuh ki jingujor, u samla Mandor ula ong “Ka NEHUSU ka sngewthuh ba kala donkam ban thaw daka Gender Sensitization Committee hapoh ka skulbah naka bynta ki samla pule, ki nonhikai bad ki nongtrei”.
Haba pynpaw ka jingdonkam ban pynsngewthuh paidbah halor ki kam thombor, ula ong “Ka NEHUSU ha ki sngi ban wan kan sa sdang noh iaka Gender Sensitization lyngba ki Workshops, Seminars, Lectures bad ban thaw daka Gender Sensitization Committee ban iakren halor ki kam thombor iaki kynthei”.
“Kum kine ki jingjia kin sa paw paidbah ha ki sngi ban wan namar ki samla pule kila sngewthuh iala ka jong ka bor bad naka liang ka NEHUSU kan ieng ban kyrshan iaki lanot” ula ong.
U samla Mandor ula ong ba ka NEHUSU kan treim shitom ban wanrah ka jingpynsngewthuh jingmut naka bynta ban rat dkhong iaki kam sniew pyrshah iaki kynthei daki nonghikai, ki nongtrei bad baroh.
