Imphal, Naiwieng 21 : Ki samla pule MBBS ba kynthup ia 27 ngut kiba hap phet shnong bad 6 ngut ba sah hostel jong ka Churachandpur Medical College (CMC), ha ka sngi Ba-ar kila pynlong ia ka jingiakhih namar ka jingshah pynduh ban iakhun ia ka eksam First Year kaba sdang hynne ka sngi.
Kine ki samla pule kila pynlong ia ka jingiaid rally na Tuibong Bazaar sha ka Ophis u Deputy Commissioner bad hangne kila pynlong ia ka jingiashong kyllain myngor. Hadien kane, kila leit ban aiti ia ka dorkhas sha u Additional DC.
U Coordinator ka North East Student Organisation (NESO) Ejan Lotha haba iakren bad kine ki samla pule, ula kular b aka seng kan sa shimkhia ia kane ka ishu jong ki bad kan pyrshang katba lah ban pynbeit ia kane kam.
Ha ka dorkhas bala phah sha ka Lat ka Jylla Annusuiya Uiker lyngba u ADC ka Churachandpur, la pyntip ba ki don haduh 27 ngut ki samla pule riewlum kila pyndap ia ki phorm eksam, admit card bad siew ruh ia ka bai eksam nalor ka jingaiti ia ki kot ban siew ia ka pisa lyngba u Deputy Commissioner (DC) ka Churachandpur.
Ka dorhas kala ong ba ki don haduh 27 ngut ki samla pule MBBS bad arngut ki BDS kiba pynkhreh ia ka eksam kaba dei ban long naduh ka 14 tarik Naiwieng bad 21 tarik Naiwieng.
Hynrei ha ka minit ba khatduh kata ha ka 13 tarik Naiwieng kila shah khang na ka jingshong ia ka eksam BDS bad ruh ia ka eksam MBBS kaba dei ban long naduh hynne ka sngi.
