Shillong, Naiwieng 14: U President ka National People’s Party (NPP) u Bah Prestone Tynsong hynne ka sngi Baar, ula kyntait ba ka don ka jing pynbor na ka party ban ai tiket ia u MLA barim ka Mawhati Bah Dasakhiat Lamare ba un iakhun ia ka MP Elekshon na Shillong Parliamentary constituency.
Haba iakren bad ki nongthoh khubor, u Bah Prestone Tynsong ula ong, “Kam don eiei ruh. Ngam don jingtip. Ngam tip naei phi ioh ia katei ka jingtip hynrei ka jingtip ka jong nga halor kane ka long em kam don eiei”.
Kane ka jingkren jong u Bah Prestone kadei hadien ka jingsaphriang ki khubor kiba kynnoh ba kala don ka jingiapher jingmut hapdeng ki nongialam jong ka NPP, hadien ba u Symbud Myntri Rangbah ka jylla Bah Sniawbhalang Dhar u kwah ba ka NPP kan ai tiket ia u bahaiing u jong u u Bah Dasakhiat Lamare ban iakhun iaka elekshon MP kaban wan.
U Bah Prestone ula pyntip ba ka seng kan sa pynbna ia ka kyrteng jong ki kyrtong ban iakhun iaka elekshon MP Lok Sabha na Shillong bad Tura parliamentary hapoh u Naiwieng.
Ula iathuh ba kila don haduh 5-6 ngut kiba la pynpaw ia ka jingthrang ban iakhun iaka elekshon MP na Shillong, hynrei ha kaba iadei bad ka Tura, ka MP kaba mynta ka Agatha K Sangma kan pynkhreh biang ban iakhun ia ka elekshon MP kaban long ha u snem ban wan.
