Nongpoh, Naiwieng 14 : Kawei ka samla Nongiakhun kti na Lyumdieng, Umden, Ri-Bhoi, ka Senibi Syngkli kala pynkhreh bha ialade ban mihkhmat ia ka India sha ka Asian Arm-Wrestling Cup ha Uzbekistan, ka ban sdang naduh ka 17 tarik Naiwieng haduh ka 25 tarik.
Ka jinglah jong ka samla Senibi ban pyni ia ka sap ialehkai ba kham janai hapdeng ki nongiakhun kti ka Ri, kala pynskhem ia ka ban ioh mihkhmat ia ka Ri sha kane ka lympung ba hehduh ka dewbah Asia.
Ka samla Senibi dang shen kala lehkai bha ha ka 45th National Arm-Wrestling Championship 2023 ba long ha Jammu bad Kashmur, ha kaba kala ioh rah ia artylli ki takma ksiar bad artylli ki takma rupa.
Kum shibynta ban ai jingithuh ia ki jingjop jong kane ka samla bad ban kyrshan ruh ia ka jingpynkhreh jong ka ban leit iashimbynta ha ka Asian Arm-Wrestling Cup, ka seng Megalaya People Social Organisation (MPSO) na Ri-Bhoi kala iakynduh ia ka samla Senibi ha ka sngi Ba-ar.
Kane ka Seng kala synniang da ka song pisa ban iarap ia ka jinglut jingsep ha ka jingleit iashimbynta ssha kane ka lympung ban long ha Uzbekistan.
Ka Seng kala kitbok kitrwiang ruh ia kane ka samla ialehkai ba kan wanrah ia ka nam ka burom ia ka Ri bad ka Jylla ha ka rynsan ialehkai jong ka pyrthei.
