Shillong, Naiwieng 13 : Ka United Democratic Party (UDP) ha ka sngi Nyngkong, kala thaw ia ka State Election Committee (SEC) ban jied ia u kyrtong ban mih iakhun ha ka elekshon Lok Sabha bad ruh ia ki kyrtong jong ka elekshon MDC ka ban long ha u snem ban wan.
Hadien ba pyniaid ia ka jingialang jong ka Central Executive Committee (CEC), u President ka UDP Bah Metbah Lyngdoh ula ong “Ka CEC kala mynjur ia ka jingjied ia ki dkhot jong ka SEC bad ka SEC kan dei na ka bynta ka elekshon MP bad MDC”.
“Ngi la ieh ha ka jingstad ka SEC ba kan khmih ia kine ki kam ba iadei bad ka jingjied kyrtong napdeng kito ki briew kiba la pynpaw ba ki kwah ban iakhun na ka party” ula ong.
Ka UDP kala rai ruh ban pynmih kyrteng na baroh artylli ki parliamentary seat-ka Shillong bad Tura, kiba la mihkhmat mynta da u bah Vincent H Pala jong ka Congress bad ka Agatha K Sangma jong ka NPP.
U Bah Metbah u pyntip ba ka CEC kala rai ruh ban mynjur ia ka rai bala iashimlang da ki Nongialam ka UDP bad HSPDP ha ka jingialang ba long myn ha ka 7 tarik Naiwieng, ba kin iatreilang ha ka elekshon Lok Sabha na Shillong Parliamentary Seat.
Ula ong ba ia ka Tura Parliamentary seat, ka CEC ka ieh ha ka SEC ha ryngkat ki katto katne ki nongialam na Ri-lum Garo ba kin shim rai ia u ne ka kyrtong.
“Ha kajuh ka por, ka CEC kala bthah ia baroh ki Circle bad ki District ba kin bteng ha kaban trei n aka bynta ka party bad ruh ban nang pynkhlain nalor ban pynkhreh bha ruh ia ka elekshon MP bad MDC” ula ong.
Kat kum ka tyllong khubor na ka UDP, ki don laingut kiba la pan ticket na ka UDP ban iakhun na Shillong seat ha ka elekshon Lok Sabha bad kine ki dei u Nongialam barim ka HYC Bah Robertjune Kharjahrin uba la pyniasoh sha ka UDP myn ha ka sngi saitjain, u President ka Khasi Author Society Dr DRL Nongleit bad u MLA barim ka Mawlai Bah PT Sawkmie.
