Guwahati, Naiwieng 12 : Ki Pulit ka Kerela kila kem ia ki arngut ki shijur kiba dei na Assam halor ka jingkynnoh ba ki pyniap iala ka khun ba dang 19 sngi bad bret pat ia ka met hajan ka wah ha Mudikkal, Kerala.
Ia kine ki shijur la kem da ki Pulit ka Perumbavoor na Assam. Kine ki kynthup ia u Maksidul Islam bad ka Mushida Khathoon.
Kat kum ka khubor, ia kane ka Khunlung la ioh ban tam na kawei ka pla plastic kaba la bret hajan ka wah ha Mudikkal myn ha ka 8 tarik Risaw.
Kine ki shijur kiba shu iashong iasahlang dalade, kila set op ia kane ka khunlung haban da iap namar ka jingbym pat kwah ban long Kmie long Kpa.
Hadien ba pyniap, kila song ia ka met ha ka pla plastic bad bret hajan jong kane ka wah.
Ka jingtohkit jong ki Pulit ia ka jingdon ki longkmie ha ka thain kala lam sha ka jinglap ia kane ka kynthei na Assam, kaba dei ka nongtrei jong kawei ka karkhana plywood.
Hynrei ki Pulit kim shym la iohkem ia ka Mushida namar ka jingkloi ban wan phet sha Assam ha ryngkat bad u Makzidul tang mar syn dep leh ia kane ka kam.
Ki Pulit kila lapdien ia kine ki shijur hadien ka jingpynkhlain ia ka jingtohkit. Kat kum ka jingiathuh ki Pulit, kine ki shijur kila iasuhbuit ban pyniap ia kane ka khunlung hadien ka jingiania kaba jur hapdeng jong ki namar ka jingarmet.
