Shillong, Naiwieng 07: Ki nongtrei ASHA jong ka Meghalaya hynne ka sngi kila rai ba pynbteng iaka jingiakhih daka ba sangeh treikam khkem pud ha baroh kawei ka Jylla.
Ia kane la pynbna daka President ka Meghalaya ASHA Workers’ Union (MASHAWU) ka Kong Mirajune Myrsing haba pyntip ba ia kane ka rai la shim namar ki nongtrei ASHA kim hun iaka jubab jong ka Myntri ka tnat ka koit ka khiah ka Kong Ampareen Lyngdoh haba iadei bad ka jingdawa kyntiew bai nong iaki nongtrei ASHA hapoh ka Jylla.
Haba kren sha ki lad pathai khubor ka Kong Mirajune kala ong ba ka jingkam ka Myntri ka tnat ka koit ka khiah ba ki ASHA ki ioh ka bai nong haduh T.7000 ka long kaba ialam bakla hynrei kaba shisha ka long ba ki ASHA kim ju ioh palat iaka T.2000 man u bnai.
“Watla ka sorkar Jylla lyngba ka National Health Mission (NHM) ka siew T.2000 man u bnai iaki ASHA hynrei baroh kim ju ioh lut ia kaei kaba la kular bad bun ki ASHA hapoh ka Jylla ki ioh tang T.800 man u bnai” la ong ka Kong Mirajune.
Ka Kong Mirajune kala ong ruh ba ki ASHA ki burom bad ki sngewnguh iaka sorkar Jylla bad dei namar kane baroh shi katta kim mih madan ban iakhih namar ki don jingkyrmen baka sorkar kan leh iaka ba donkam ban kyntiew iaka bai nong.
“Baroh shi katta ngi shaniah haka Sorkar bad dei namar kane ngim mih madan hynrei mynta ngi la rai ban iakhih noh daka sangeh treikam namar ngim hun iaka jubab ka Myntri khamtam hadien baka kam ba ki ASHA ki ioh T.7000 man u bnai” kala ong.
Naka liang ka Adviser jong ka MAWU ka Kong Sonny Kharjana kala ong ba ki ASHA ki dawa baka sorkar Jylla kadei ban kyntiew iaka bai nong naka T.2000 shaka T.5000 man u bnai.
Ka Kong Sonny kala iathuh ba ki ASHA kim ju ioh ka bai nong kumba la kam daka Myntri ka tnat ka koit ka khiah bad hadien ba ki kynthei ki shimti iaka kam ASHA kim lah shuh ban leit bylla shawei pat bad dei namar kane ka buh jingeh iaki ban pyndap ha ïing hasem tang da ka bai nong ba ki ioh naka kam ba ki leh hala shnong.
Pule lang ia kane: Pynthymmai ka MWA ia ki Nongkitkam ban nang kyntiew ia ka jingialehkai Weightlifting
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
