Aizawl, Naiwieng 07: Ka jingiathep vote ban jied ia ki 40 ngut ki Nongmihkhmat ba thymmai sha ka Iingdorbar Thaw Ain ka Mizoram, kala sdang hynne ka step sngi Ba-ar hapdeng ka jingpahara kaba khlain bha.
Ki nongthep vote naduh ki rangbah bad ki samla kila ieng lain naduh ka por mynstep ban pyndep iala ka kamram ha kaban jied nongmihkhmat.
Kat kum ka jingpyntip ka ECI, palat 8.5 lak ngut ki nongthep vote kin thep ia ki vote jong ki ha ki 1,276 tylli ki polling station jong ka Jylla.
Haduh 174 ngut ki kyrtong na ki seng sain pyrthei bapher bapher kynthup ia 27 ngut ki kyrtong Shimet, kila mih ban aireng ha kane ka elekshon.
Haduh 4,13,064 ngut ki nongthep vote ki dei ki shynrang bad 4,39,028 ngut ki dei ki kynthei ha Mizoram. Napdeng ka 8,52,088 ngut ki nongthep vote, 50,611 ngut ki nongthep vote ki dei kiba dang hapdeng 18-19 snem, ki ban thep vote ruh ha ka sien ba nyngkong eh.
Ka Mizo National Front (MNF) kaba synshar ia ka Jylla, ka Zoram People’s Movement (ZPM) kaba don ha ka Liang Pyrshah bad ka Congress kila pynieng kyrtong ha baroh 40 tylli ki constituency.
Ka BJP kala pynieng 23 ngut ki kyrteng katba ka Aam Aadmi Party kala pynieng 4 ngut ki kyrtong.
Ha ka elekshon 2018, ka MNF kala jop haduh 26 seat bad ioh ia ka vote share ba kot haduh 37.8% ban ioh ia ka jingjop.
