Shillong, Naiwieng 6: U Bah Teinwell Dkhar uba long u Member of District Council (MDC) uba mihkhmat ia ka Shella Constituency, ula shim ia ka rai ban ym iakhun shuh iaka elekshon MDC kaban wan namar ka jingbym don ha ka met kaba koit ba khiah.
U Bah Teinwell Dkhar uba la don 60 snem ka rta ula pynpaw ba ka jingshim ka jongu ia katei ka rai kadei namar ka jinglong jingman jong ka koit ka khiah ka jong u.
Ula ong, ba watla yn ymiakhun shuh iaka elekshon MDC hynrei yn iai bteng pat ban trei bad ban long kum u dkhot jong ka seng United Democratic Party (UDP).
U Bah Teinwell ula don la slem bha ha ka seng UDP bad ula shakri ruh kum u General Secretary jongka East Khasi Hills bad udei ruh u paralok uba iajan bha bad u (L) Dr. Donkupar Roy, u Myntri Rangbah barim ka jylla.
U Bah Teinwell ula long MDC la bun snem bad ula long teng ruh kum u Chief Executive Member ka Khasi Hills Autonomous District Council (KHADC).
Ha kaba iadei bad ka jingjied kyrtong na ka bynta ban iakhun iaka elekshon MDC na Shella, u Bah Teinwell ula iathuh ba yn sa shim ia ka rai kaba khatduh da ka jingiatreilang hapdeng jong ka seng bad ki nongkyrshan ki jong ka.
