Shillong, Naiwieng 04: Namar ka jingbitar palat ia ka jingsniew ki surok khamtam ki surokbah (National Highway) hapoh ka thain West Jaintia Hills, ka Joint Action Committee (JAC) War Jaintia hynne ka sngi Saitjain, kala byrngem ban ujor noh shaka ïingbishar pyrshah iaka Company Dhar Company.
Haba kren sha ki lad pathai khubor u Chairman ka JAC Bah Yoodahunki Shylla ula iathuh ba kane ka jingthmu ban leit ujor shaka ïing bishar pyrshah aika Dhar Company kadei namar ba dei kane ka kompani kaba pyntrei iaka National Highway (NH-206) haka jinglut kaba kot haduh T.43 klur tam.
Ka surok NH-206 ka dei kaba sdang na Jowai marjan ka surok NH-106 bad ka iaid lyngba sha Dawki bad kut pat ha Mylliem. Ka dei ruh shibynta jong ka surok Shillong-Sylhet.
U Bah Yoodahunki ula iathuh ba kane ka surok bah (NH206) kadei kaba sdang naduh ka shnong Nongtalang sha Dawki, ka ba don 16 Km ka jingjrong bad la mang pisa T.43 klur tam. Ia kane ka surok la sdang ban pyntrei naduh ka 9 tarik Nailur 2022 hynrei tang hapoh ka 12 bnai kane ka surok kala jot rathai.
Ula kynnoh ba tang hapoh 12 bnai bala pyndep iaka surok daka Dhar Company, kane ka surok kala jot rathai bad kynnoh ba kane ka paw shai ba ka Dhar Company kala shu pyntrei torti ia ka surok tang ban ioh jingmyntoi shimet.
“Ka JAC ka la leit ban jurip ia kane ka surok bad ka la lap ia ka jingpyntrei torti jong ka kompani. Tang 2 bnai hadien ba la dep shna, kane ka surok ka la sniew biang” la ong u bah Yoodahunki.
U Bah Yoodahunki ula iathuh ba naka liang ka JAC kala pan ruh ia ka RTI halor kane ka surok ban lap ia ka jingtip ba bnaih bad la shem ba naka liang ki Engineer ki la dep ban pynlait pisa haduh T.12 klur tam sha ki Contractor khlem da leh ia ka jingbishar bniah halor ka rukom shna ia kane ka surok.
Ula ong “Na ka liang ka JAC ka la shong da ka jingialang bad ki nongialam shnong ka thain bad kala shim ia kawei ka rai ba kin leit ujor noh sha ka ingbishar pyrshah ia kane ka Dhar Company ka ba la pyntrei torti ia kane ka surok”.
Nalor kane ka JAC kala dawa ruh ba u Chief Engineer udei ban pynshai halor ka jingleh matlah jong ka tnad ia ki jingpyntrei torti ka Dhar Company ia kane ka surok namar tang 2 bnai hadien ba la dep shna kane ka surok ka la jot rathai biang.
 hapoh ka thain West Jaintia Hills, ka Joint Action Committee (JAC) War Jaintia hynne ka sngi Saitjain, kala byrngem ban ujor noh shaka ïingbishar pyrshah iaka Company Dhar Company.){kind=link}