Shillong, Risaw 30 : Ka Iingkashari Meghalaya High Court ha ka sngi Nyngkong kala ong ba kan ai ka jingmynjur ha kaban pyniar ia ka jingtohkit halor ka jingsuba iasopsop hapdeng ka Sorkar Pdeng bad ki karkhana dewbilat kiba don ha East Jaintia Hills District.
Ia kane ka hukum la pynmih hadien ba u nongmudui jong ka PIL Shailendra Kumar Sharma, uba kam ialade kum ki riew niam bad uba la kren ia shibun ki kam ba iadei bad ka mariang, ula wanrah ia ki jingshisha kiba buh jingma haba iadei bad ka jingtreikam jong ki karkhana dewbilat ha East Jaintia Hills District.
“U Nongmudui ula kyrpad ban pyniar ia ka jingtohkit, kynthup ia ka jingsuba donkti hapdeng ka Sorkar Jylla bad ki 7 tylli ki kompani dewbilat kiba long mamla, yn sa mynjur ha ka sien shong bishar ban wan. Buh ia kane ka mukotduma ban bishar biang ha ka 7 tarik Naiwieng, 2023” ong ka Iingkashari ba kynthup ia u Chief Justice Sanjib Banerjee bad Justice B Bhattacharjee ha ka hukum.
Kat kum ka jingong une u nongmudui, ki 7 tylli ki kompani kila ioh ia ka jingbit na ka Sorkar Jylla ban pyntreikam ia ki karkhana dewbilat ha ryngkat bad ka power plant ba 10 mw hynrei kine ki karkhana kila pynmih kham palat ia ka dewbilat ban ia kaei kaba la buh da ka Sorkar ha ka shithi ai jingmynjur ba 13 tarik Naiwieng, 2008.
Une u Nongmudui ula kam ba ki kam tih marpoh khyndew haba iadei bad u mawshun ka dei kaba la leh da kine ki 7 tylli ki kompani khlem da ioh ia kano kano ka licence ne ka jingbit.
Ka hukum ka ong ba halor kane ka mat, u nongmudui ula pynsngew ia ki jingkylli kiba la buh da ka Ministry of Mines ha ka 2 tarik Lber, 2022 bad kam bad ka jubab jong ki 7 tylli ki kompani ia kine ki jingkylli kim shym la pynpaw satia ba kila ioh ia kano kano ka licence ba tih mawshun.
Ka Iingkashari kala bthah ban pyntip ia baroh ki nongshah mudui kynthup ki 7 tylli ki kompani ba kane ka mukotduma kan sa don biang hadien shitaiew n aka bynta ban jubab ia ki jingkylli bala rah da une u nongmudui.
Pule lang ia kane: Khylliap lama ki samla ia ka HITO ha Ri-Bhoi ba kynnoh leh donbor u President Sengkmie
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
