Shillong, Risaw 25: Ka Hynniewtrep Youth Council (HYC) Nongthliew Circle hynne ka sngi Balang, kala iakynduh ia u Director ka tnat School Education & Literacy bad dawa ban kyntiew kyrdan noh iaka Umthlong Nongthliew Govt. Secondary School shaka Higher Secondary School.
U president ka HYC Nongthliew Circle samla Jop Kharnaior ula ong ba ka sorkar jylla naduh 2019, kala kular ban kyntiew kyrdan iaka Umthlong Nongthliew Govt. Secondary School hynrei haduh mynta ym shym la paw dak satia ha ka jing pynkhreh ban kyntiew kyrdan ia kane ka skul.
U samla Joplang ula iathuh ba ka Umthlong Nongthliew Govt. Secondary School ka dei kaba shakri iaki khynnah pule jong ki 18 tylli ki shnong kiba hap hapoh Nongthliew hynrei ka long kaba sngewsih ba haduh mynta kane ka thain kam pat don satia ka Government Higher Secondary School.
U la iathuh ba ia kane ka skul la seng naduh u snem 1956 bad naka liang ka seng ka la ju buddien naka por shaka por ban ioh kyntiew kyrdan ia kane ka skul kaba la shakri haka pule puthi mynta la palat 50 snem.
Haba kylli, u nongialam ka HYC ula ong ba naka liang u Director ruh ula pynsngew ba kala donkam iaka sorkar ban kyntiew kyrdan iaka Umthlong Nongthliew Govt. Secondary School shaka Higher Secondary School.
