Imphal,Risaw 25 : Ka Indigenous Tribal Leaders’ Forum (ITLF) kala ther ia u Hehduh ka RSS Moham Bhaghwat halor ka jingkren hynnin ka sngi Ba-ar ia ka jinglong jingman ha Manipur haba kynnoh pat ia u Myntri Rangbah ka Jylla N Biren Singh halor ka jingkhie ka kam iaumsnam hapoh ka Jylla.
U Hehduh ka Rashtriya Swayamsevak Sangh (RSS) Mohan Bhagwat haba kren ha ka jingrakhe Vijayadashami ha madan Reshimbagh, Maharashtra, hynnin sngi halor ka Manipur, ula ong ba dei ki kynhun kiengatiar kiba kwah iakhun laitluid, kiba donkti ban pynmih ia kane ka kam umsnam.
Baroh ar kynhun kata ki Kuki bad ki Meitei kila ia imsuk imsain hapdeng jong ki da ki phew snem hynrei ka jingkulmar kaba mih na ki jaka khappud, ula ong.
U Nongilaam ka ITLF bad nongaiktien Ginza Vualzong ula ong ba kam shym la don satia kano kano ka jingialeh hapdeng ki Meitei bad ki Kuki-Zo ha baroh kine ki snem hashuwa ba ka BJP bad ka Sorkar u Biren Singh kan shimti ia ka bor synshar.
U Vualzong ula ong ba ka Sorkar dang shen kala weng noh ia ka Armed Forces (Special Powers) Act (AFSPA) na ki districts ba bun paid ki Meitei hynrei ym ia ki jaka ba bun ki paid riewlum bad kane ka dei jingleh riewkhlaw naduh ba wan synshar ka Sorkar ba kyrshan ia ki kynhun kiengatiar kiba treikam hapoh ka Imphal Valley.
“Balei ba ka notification 1966 ka Sorkar kaba iadei bad ka ‘Reserved” and “Protected” Forest hapoh ka Indian Forest Act, 1927 la pyntreikam kyrkieh ha u 2023, kata ruh khlem da iaid kat kumki kyndon ka Ain, ba kynthup ia ka jingiasyllok shuwa bad ki kynhun bapher bapher” ong une u Nongialam ka ITLF.
U ong ba ka jingdawa jong ki paid Meitei ban ithuh kum ki Scheduled Tribe (ST) kala khie im kynsan hapoh ka Jylla bad la pynman pat ia ki Kuki-Zo kum ki poiwir bad kynnoh ruh ia ki paid riewlum ka jylla halor ka jingjyllei u droks.
