Shillong, Risaw 17: Ka Seng Samla Balang Catholic Mawkynrew kala pynbna ban pynlong iaka tamasa bam Sohphlang haka 21 tarik mynta u bnai.
Haba kren sha ki lad pathai khubor u president ka Seng Samla Balang Catholic Mawkynrew bah Pynbianglang Kshiar ula pyntip ba ia kane ka tamasa bam Sohplang yn pynlong hapoh ka Holy Cross School Mawkynrew bad ka thong jong kane ka tamasa kadei ban kyntiew ia u Sohplang u badei ruh u jingbam tynrai jong ki paidbah ka thain Rilum Khasi-Jaintia.
U bah Pynbiang ula iathuh ba kane kadei ka sien ba nyngkong eh hapoh Meghalaya ban pynlong ia kane ka tamasa ban kyntiew ia u Sohplang ka ban nang pynshlur shuh shuh iaki nongrep ban rep ia une i jait jingbam.
“Ia kane ka tamasa bam Sohplang yn bei tyngka daka tnat Tourism ka sorkar jylla haka jingiatreilang bad ka tnat ka rep ka riang bad ka Meghalaya Age” la ong u bah Pynbiang.
U bah Pynbiang ula pyntip rug ba ha kane ka tamasa yn pyninam ruh ia kiwei ki mar rep kum u soh Strawberry, u Krai bad kiwei kiwei de ki jait jingbam ba pynmih hi da ki nongrep bad ki paidbah ka thain Mawkynrew.
Ula pyntip ba ha kane ka sngi ka Seng Samla kan pynieng bun tylli ki Stall ban pyninam iaki mar rep, ki jingbam tynrai bala pynkhreh daki paidbah ka thain.
