New Delhi, Risaw 17 : Ka Iingkashari bakhlieh duh ka Ri India- ka Supreme Court kala pynmih ia ka hukum ba ong ba kam lah satia ban ai jingithuh da ka ain ia ka jingiashongkha para kynthei ne para shynrang (same sex marriage) haba kyntait ruh ban ai ia kajuh ka hok iashongkha ia ki LGBTQIA+ hapoh ka Ri.
U Chied Justice ka India (CJI) DY Chandrachud ula ong ba ka jingthaw ia kane ka Ain ka shong eh ha ka bor jong ka Iingdorbar Parliament.
Ka Iingkashari ba san ngut ki Nongbishar bala khlieh da u CJI D.Y Chandrachud haba shong bishar ia kane ka mukotduma kaba la iaid naduh u bnai Iaiong bad Jymmang mynta u snem, kala pynmih ia ka hukum hynne ka sngi Ba-ar.
U CJI ula ong ba ka don ka bynta ba “mynjur bad bym mynjur ba haduh katno ngi lah ban iaid” halor ka jingiashongkha para kynthei ne para shynrang haba pule ia ka hukum.
Arngut na ki saw ngut ki Nongbishar kila mynjur bad ka CJI ba ka Iingkashari kam lah ban ai jingithuh kat kumka ain ia ka jingia shongkha para shynrang ne para kynthei.
Kane ka hukum ka Iingkashari kala mih san snem hadien ka hukum u snem 2018 ba ka Iingkashari kala pynduh noh ia jingkhang ia ka gay sex jong ka por synshar ka ri Bilat.
Lah ban kdew hangne ba tang ka Taiwan bad ka Nepal kaba shah ia ka jingiashongkha para kynthei ne Shynrang ha dewbah Asia.
Ka Sorkar u Myntri Rangbah Duh ka Ri Narendra Modi, kala pyrshah ia ka jingmudui mukotduma bad ong ba dei ka Iingdorbar Parliament, ka rynsan ban iatai bad thaw ain halor kane ka kam.
Kala ong ruh ba kum kane ka jingiashongkha kam iahap satia bad ka jingmut jingpyrkhat jongki Longiing ka India halor u Lok, ka kurim bad ki Khun.
 haba kyntait ruh ban ai ia kajuh ka hok iashongkha ia ki LGBTQIA+ hapoh ka Ri.){kind=link}