Shillong Risaw 16: Ka NEIGRIHMS sa shisien kala jam sha uwei u mawmer da ka jingsdang kaba dang shen ia ka 4-D Radiation Therapy na ka bynta ki nongpang Bampong ne Cancer kaba dei ka sien kaba nyngkong eh ha ka thaiñ.
Kane ka rukom ai jingsumar lyngba ka Radiotherapy kadei kaba la leh tang ha ki katto katne eh ki jaka kiba don ha kylleng jong ka ri India kaba long kaba ai jingmyntoi bha haka jingsumar ia u Tumour uba iaid ryngkat bad ka jingring mynsiem, katei ka buit treikam kaba kyrpang ka iarap shibun ha kaban weng iaka bampong khlem da ktah ia kiwei pat ki bynta jong ki dkhot met.
U Prof. (Dr) Nalin Mehta, Director ka NEIGRIHMS, ula ai khublei ia ka kynhun kaba kynthup ia ka Dr. Sumit Kumar, Deiwakor Chyrmang, Resident Doctors, Radiation Safety Officer, Medical Physicist bad Radiotherapy Technologists kiab la trei bha ia ka kam kum ka kynhun.
“Nga dap da ka jingsngew sarong ban pynbna ba ka NEIGRIHMS Radiotherapy Department kala lah ban pyntreikam kyrpang iaka 4D-RT, ia kaba la tip ruh kum ka Respiratory Gating, kaba shim tang ia ka bynta jong ka bampong kaba iaid bad u nongpang ha ka por ba u ring ne pynhiar mynsiem bad ha ka juh ka por ka pynduna iaka jingktah ia ki sawdong sawkun jong ki thied ki jaw” ong u Director ka NEIGRIHMS.
Ula ong, nalor ka jingdon ia kiwei pat ki tiar ki tar kiba kyrpang kum ka High Energy Linear Accelerator, 4D-CT Simulator bad Brachytherapy, yn lah ban ai iaka jingsumar kaba paka iaka jingpang bampong kaba iaryngkat kyrdan bad ka pyrthei, lyngba ka Regional Cancer Centre, NEIGRIHMS ym tang ia ki nongpang ka jylla Meghalaya hynrei wat ia kito kiba na ki jylla jong ka thain shatei lam mihngi bad ki ri kiba marjan.
U Dr Vikas Jagtap, Additional Professor &Head, Department of Radiotherapy, ula pynpaw ba katei ka rukom ai jingsumar ka dei kaba hap ban pynlut bun bha ia ka por bad ka jingpyndonka mia ki kot teknoloji bad ka jingai jinghikai katto katne sngi ia u nongpang ha kaba iadei abd ka jingring bad jingpynhiar mynsiem khnang ba ka rukom ai jingsumar lyngba ka Radiation kan long kaba iaid beit.
Ula iathuh, ba kila don 250 ngut ki nongpang kiba la ioh iaka jingsumar lyngba ka buit Advanced Radiation kum ka 3D-CRT, VMAT (Volumetric Modulated Arc Therapy) bad ka ARC Therapy kaba iarap ban pynduna iaka jingktah jongka Radiation.
U Myntri ka sorkar pdeng u Dr. Mansukh Mandaviya, ha ka sngi Saitjaiñ ula plie ia ka Regional Cancer Centre jongka NEIGRIHMS bad ula iaroh ia ka jingshimkhia ka NEIGRIHMS ha kaban pynbiang iaka jingai jingsumar kaba paka ia ki nopngpang bampong.
Lah ban kdew ruh ba ka Radiotherapy bad Chemotherapy ha NEIGRIHMS kadei kaba la leh ha ka dor kaba jem bha na ka bynta ki nongpang bampong bad la ai ruh iaka jingsumar na ka bynta kito kiba la pynrung kyrteng ialade lyngba ka MHIS bad PM-JAY Scheme da kaba pyni ia katei ka card ban ioh iaka jingsumar.
