Shillong, Risaw 16 : U Myntri Rangbah ka Jylla Conrad K Sangma hynne ka sngi Nyngkong, ula leit jurip ia ka Building jong u Amit Singkhania ha Thana Road, Police Bazar, Shillong, kaba la shah bam duh khait ha ka ding kaba pluh myn ha ka sngi Saitjain.
Kane ka building kaa don bun ki godown bad ka iingsah jong u Singkhania, kala shah pynjulor klai hakane ka ding.
Ki kali pynlip ding kat haduh mynta ki dang iakhun ban pynlip ia ka ding. Ka jingiakhun ia ka ding kala jan kot haduh 40 kynta hynrei watla katta ka ding kam pat lip lut.
Kane ka jingjia kala jia ruh tang arsngi hadien ka jingleh mock drill jong ka Sorkar Jylla ban tem ia ki jinglynshop ki bor jong ka mariang.
U Myntri Rangbah ka Jylla ula shong bishar kam halor kane ka jingjia baroh bad u Chief Secretary, u Director General of Police lem bad ki Heh Ophisar ka Jylla.
U Myntri Rangbah ula iakynduh ruh ia ka Longiing u Singhania bad pynpaw ia ka jingsngewkhia halor kane ka jingjia haba ai jingithuh ruh ia ka jingtrei borbah jong ki shipai, ki Pulit, ki pulit pynlip ding bad ki kynhun bapher bapher kiba ia don bynta ha kaban tem ia kane ka jingjia.
