Shillong, Risaw 13: Ka Hynniewtrep Youth Council (HYC) War Jaintia hynne ka sngi Thohdieng, ka la dawa naka Myntri ka tnat ka koit ka khiah Kong Ampareen Lyngdoh ba kan tuklar lem haba iadei bad ka jingduna ki jingdonkam ha ki jaka sumar kiba don hapoh ka thain War Jaintia.
Ka HYC War Jaintia kala dawa ruh naka Myntri ban kyntiew kyrdan ia ka PHC Pdengshakap, Jaraiñ bad Dawki, State Dispensary ha Padu bad ka Community Health Center CHC Nongtalang kaba dang hap hapoh ka Amlarem Sub Division.
Haba kren sha ki lad pathai khubor u president ka HYC War Jaintia u samla Tohmondiam Mukhim ula kam baka seng kala dep ban leit jurip ia kine ki jaka sumar kiba don hapoh ka thain bad kala lap shibun ki jingduna ka bym i long ruh ban ai jingsumar iaki paidbah ka thain.
U samla Tohmondiam ula iathuh ba haka jingialang ka seng kala pynsngew shaka Myntri ka tnat ka koit ka khiah ban tuklar mardor halor ka jingduna ki jaka sumar hapoh ka thain namar kane ka wanrah jingeh iaki paidbah kiba donkam shi bun ki lad jingsumar.
“Jan baroh ki jaka sumar hapoh ka thain War Jaintia naduh ki Health Centre, ki PHC bad CHC ki duna ki tiar ban ai jingsumar bad ki don ruh ki jaka sumar kiba la jot rathai bha bad kiba donkam maramot mardor bad dei namar kane ngi la dawa naka Myntri ban shimkhia halor kane naka bynta ka jingmyntoi ki paidbah” la ong u samla Tohmondiam.
Haba kylli u samla Tohmodiam ula iathuh ba haka jingialang ka Myntri ka tnat ka koit ka khiah ka kong Ampareen Lyngdoh ka la kubur ban shimkhia ia kane bad kala kular ruh ba kan wan jurip ia kine ki jaka sumar ha ka 14 tarik tarik mynta u bnai ban lap hi dalade ia ka jinglong jingman kine ki jaka sumar hapoh ka thain.
