Shillong, Risaw 13: Ka sorkar jylla kala khmih lynti ban pdiang ia palat 1 lak ngut ki nongshangkai pyrthei ki ban wan shim bynta haka Shillong Cherry Blossom Festival 2023 ban long ha Jylla
Haba pynbna ia kane, u Myntri ka tnat kam jngohkai Bah Paul Lyngdoh ula pyntip ba iaka Shillong Cherry Blossom Festival 2023 yn pynlong naduh 17 haduh 19 tarik Naiwieng 2023 ha nongbah Shillong bad ha Ri-bhoi District.
Haba kren sha ki lad pathai khubor u Bah Paul ula ong ba watla ka tamasa kaba heh duh kan long hapoh ka RBDSA Sports Complex, Ri-Bhoi District, hynrei kin don ruh ki katto katne ki Tamasa ki ban long ha nongbah Shillong.
U Bah Paul ula pyntip baka sorkar jylla lyngba ka tnat kam jngohkai kala iarap T.1.99 klur naka bynta ban pynlong iaka Shillong Cherry Blossom Festival 2023 namar ha kine ki sngi jong ka tamasa, ka jylla kan sa ioh ban sakhi iaki nongrwai bad nongtem kiba la paw bha hapoh ka pyrthei.
“Ka jinglut ban pynlong iaka Shillong Cherry Blossom Festival 2023 ka long kumba T.9 klur hynrei ka sorkar ka iarap tang T.1.99 klur namar kane ka tamasa kan khring palat 1 lak ngut ki nongwan shangkai na kylleng ka ri India bad na kiwei ki Ri bad kane ka Tamasa kan iarap ruh ba kyntiew iaka jingioh lum khajna ha kine ki sngi ba long ka tamasa” la ong u Bah Paul.
U Bah Paul ula pyntip ruh ba ha kine ki sngi ka jylla Meghalaya kan sakhi iaki nongtem ba kynsai tam hapoh ka pyrthei ba kynthup ka kynhun Jonas Blue, Ne-Yo, Ronan Keating, Hybrid Theory bad kiwei kiwei nalor ki nongrwai bad nongtem napoh ka jylla Meghalaya.
Ula ong ba kane ka tamasa kan dei ruh ban kyntiew iaki samla ka jylla daka ba ai ka rynsan iaki ban pyni iala kam sap bad haka juh ka por ban kyntiew iaka ioh ka kot khamtam kito kiba don ing basa hajan ka jaka pynlong iaka tamasa.
