Nongpoh, Risaw 12 : Haduh 183 ngut ki Longkmie ka Them Ri-Bhoi, kila pyndep ia ka jinghikai pyntbit ha ka kam shna achar, ban pynthikna ba ki achar ba ki pynmih kin dei ruh kiba lah ban pyniaid iew shabar ka Jylla bad ki Ri ka pyrthei.
Kane ka jinghikai pyntbit ka dei kaba la pynlong da ka Tnad Horticulture ka Ri-Bhoi ha ryngkat ka jingialang bad ka Food Processing ka Jylla, ia kaba la bei pisa da ka Meghalaya State Skill Development Society.
Ka Tnad kala pynlong ruh ia ka jingialang pynkup burom ia kine ki Longkmie hynne ka sngi Palei hapoh ka Ophis jong ka Tnad Horticulture, kum ka dak ka jingpynkut jong ki ia ka jinghikai.
Ym lah len ba ka Ri-Bhoi District ka dei kaba jur bha ha ka jingpynmih ia ki achar nala tynrai, kiba la shna na ki jingthung bapher bapher ba kynthup ia ki Lungsiej, ki sohmynken, ki muli, ki tit, ki jajew bad kiwei kiwei.
Ia kane ka jingialang pynkup burom la pynshongkun da ka jingiadonlang u MLA ka Nongpoh Bah Mayralborn Syiem ha ka jingiadonlang u Bah Bah Macbool L Suiam OSD ka tnad Food Processing, kong BM Umlong Joint Director ka tnad Agriculture, kong FN Sun District Horticulture Officer, kong A Kharbudon Program Manager ka MSSDS, Bah Androny Lyngkhoi Technical Associate ka tnad food Processing bad kiwei kiwei.
Haba kren maitphang, u Bah Androny Lyngkhoi u la ong ba ka thong jong katei ka project ban ai jinghikai sha ki longkmie ban shna achar ka long ban pynïar, ban pynbha bad ban pynjanai shuh shuh ïaka rukom shna ashar kat kum ka rukom kaba dei ban leh.
Ula ong ba ki nongshna achar khamtam kiba ju die haki surok bah National highway kim ju leh haka rukom kaba janai naduh ka rukom thep, ka dor, ka tarik shna bad tarik kut, ki jingkhleh ba pyndonkam haka por shna, FSSAI License Number bad kiwei kiwei, kaba pynartatien ïa kiba bun khamtam ki briew kiba wan nabar.
“Dei halor katei ka nongrim ba la ai ia ki jinghikai khnang ba ki nongshna achar kin lah ban leh janai ia ki kam ba ki trei khnang ba kin lah pyniaid iew bha ia ki mar ba ki pynmih, ka ban kyntiew ruh shikatdei eh ia ka ioh ka kot” ula ong.
U Bah Mayral Born Syiem u la pynpaw ka jingsngewkmen ban iohi ba ki longkmie na kylleng ki jaka ha Ri-Bhoi ki shim bynta ha katei ka prokram ban ioh jinghikai halor ka rukom shna achar wat hadpeng ka jingbunkam haki ïing ki sem bad ban peit ïaki khun ki kti, namar katei kan ai jingmyntoi ïaki bad kyntiew ruh ïaka rukom pynmih achar khamtam naka district Ri-Bhoi.
