Shillong, Risaw 11: Ka North Eastern Hill University Teachers’ Association (NEHUTA) kala rai ban pynjur ia ka jingiakhih da kaba pynlong ia ka rally bad shong kyllain mungor la sngi Palei halor ka jingkynnoh ba bun jingbakla ha ka jingtreikam jong u Vice Chancellor ka skulbah Prof PS Shukla.
Ka NEHUTA kala aiti ruh ia ki kot ki sla ba pyni ia ka jingpynkhein kyndon jong u Prof Shukla tang ha kine ki 2 snem ba u don ha ka shuki sha ka President ka India bad Myntri ka Ministry of Education ba kin tuklar lem ia kane ka kam.
Ha ka kyrwoh bala pyllait hynne ka sngi Balang, u President ka NEHUTA Lakhon Kma ula ong ba ka NEHUTA kala iakhun pyrshah ia u Vice Chancellor ban iada ia ka NEHU lada long da kano kano ka lynti ruh.
“Ngi la rai ban pynlong ia ka rally bad shong kyllain mungor pyrshah ia u VC. Kane ka dei ka jingkhot paidbah bad baroh na phi, la kyrpad ba phin wan iasnohkti bad ngi ha ka 12/10/2023 ha ka por 3 baje janmiet hakhmat ka NEHU Library na ka bynta ka Rally shuwa ba iaid sha ka Ophis jong u (VC) ban iashong kyllain mungor ban pyni ia ka jingpyrshah” ula ong haba kyrpad ia ka MCTA, NEHUSU bad HENUNSA ba kin ai lem ia ka jingkyrshan bad jingiatreilang.
“Ngi la iakhun pyrshah ia ki jingle bakla bad ruh ban iada ia ka hok jong ki dkhot ka Academic Coyncil kaba u VC u pyrshang ban iuhroit. Lada ngi ailad, kan dei ka kam kaba ma bha, ka ban nang aibor ia u VC ban pynkhein ia baroh ki kyndon treikam ha kiba bun ki kam kiba iadei bad ka bha ka miat jong ka skulbah” ong u prof Kma.
