Shillong, Risaw 09: Ka KSU East Jaintia Hills District kala ujor da ka ejahar pyrshah ia u Project Director ka National Highway Authority of India (NHAI) halor ka jingbym shimkhia ban pynbha noh iaka surokbah National Highway-6.
Ka KSU-EJHD hapoh ka jingialam u Samla Streamly S Suchen hynne ka sngi Nyngkong kala lei tai iaka ejahar ha u Superintendent of Police ka East Jaintia Hills District ha kaba la ujor pyrshah ia u Project Director ka NHAI halor ka jingbym leh eiei ban shna pynbha ne ban maramot iaka surokbah.
Ka KSU kala pyntip ba hadein kane ka jingujor da ka ejahar, kan leit ruh ban iakynduh ia u Deputy Commissioner ka District ha ka sngi Baar ban pan ka kaiphod ban tip haduh katno ki kam ki jam kila iaid haba iadei bad ka surokbah.
Ka seng ka la shim ia kane ka sienjam namar ka jingbym peit ka NHAI ha kaba kane ka surok kala ktah jur ia u paidbah ba iaid lyngba ka NH-6 bad ka seng kala suba ruh ba lehse ka daw jong ka jingslem ka don kaei kaei sha lyndet haba iadei bad ki kam Kontrak ha kaba ia kane ka surok bad ka Seng kam banse ban dawa ban phah tohkit ha ka CBI.
Ka KSU-EJHD kala pynpaw ruh ba ka jingbym shimkhia ki bor ba dei peit kan pynbor iaka seng ban shim pat da kiwei ki sienjam bad pynurlong ia kane ka mat kaba ktah jur ia u paidbah.
