Shillong Risaw 07: 26 ngut ki samla kynthei bad shynrang ka jylla Meghalaya kiba la sahkut ha ka jylla Sikkim, kila wan poi hynne ka janmiet ha ka nongbah shillong.
Kine ki samla kiba la mih na Sikkim kila wan poi hynne ha Inter State Bus Terminis (ISBT) bad kine kila wan da ka bus kaba la pynkhreh da ka sorkar jylla na Siliguri, West Bengal.
Kitei ki samla kidei kiba don ha ka jylla Sikkim hynrei na ka jingwan lynshop ka bor mariang kila sahkut ha katei ka jylla, kumta ka sorkar jylla kala shimkhia mardor da kaba iakren bad ka Sorkar Sikkim ban pynpoi ia kine ki samla baroh ha Siliguri bad hadien kane, la leit shaw ia kine ki samla na Siliguri bad la wan ialam noh ia ki sha nongbah Shillong.
Ynda la poi ha IBST, kine ki samla pule kila dap da ka jingkmen ban poi suk poi saiñ sha la jylla bad ki bahaiing bahasem kila wan shaw noh ia kine ki samla ban ialam sha la ki iingshong iingsah.
Kine ki samla kiba la wanphai kadei kiba na ka thain Majhitar, East Sikkim kiba pule ha Himlayan Pharmacy Institute bad Sikkim Manipal Institute of Technology.
Kine ki samla pule kila pynpaw ia ka jingsngewnguh ia ka sorkar jylla kaba la shimkhia ban pynpoi ia ki sha ka jylla khamtam haba ki don ha ka jaka kaba la shah ktah ha ka jingwan lynshop ka bor mariang.
Kine ki samla pule kila iathuh ruh ba ki dang don shuh ki khynnah pule ka jylla ha Sikkim hynrei kim shym treh la wanphai namar ba ka jaka pule kaba ki sah ka long shngain.
