Pakyong, Risaw 5: Ka Kad Liengsuin Pakyong Greenfield ka Sikkim, kaba dei tang kane hi ka Kad liengsuin ha ka Jylla, kala don mynta ha ka jingma namar ka jingiai bteng ka jingther u lapbah hapoh ka Jylla.
Kumba long mynta, ki kynroh jong kane ka Kad liengsuin kila khyllem bad julor na ka jingther palat u slap.
Kat kum ka jingiathuh ki Trai Shnong, ka kynroh kala pyni ia ka jingshong synjor da ki sngi mynta hynrei kane ka kynroh kala khyllem noh ha ka miet sngi Ba-ar hadien ka jingther u lapbah lapsan hapoh ka Jylla.
Ki trai shnong ki sheptieng mynta ba lada ka um ka ksam lyngba kane ka kynroh, ka jingpynjulor kan ap ruh ia ki shnong ba don ha them ba kynthup ia ka Challamthang, Pacheykhani bad Rorathang bad ka surok kaba pyniasoh ia ka Sikkim bad ka West Bengal kaba iaid lyngba ka Kalimpong Hilla ruh ka lah ban shah ktah jur bha.
Ha kajuh ka por, kat haduh ba thoh ia kane ka khubor, ym shym la ioh satia ban iakren bad ki bor pyniaid jong kane ka Kad Liengsuin.
Lah ban kdew hangne ba ka jingther u lapbah lapsan ha ki thain ba shatei ka Sikkim ha ki bynta jong ka Lhonak Lake, kala wanrah ia ka jingshlei um kaba shyrkhei bha hapoh ka Wah Teesta ha ka sngi Balang. Haduh 14 ngut ki briew kia iap bad palat 100 ngut ki dang jah rngai.
