Nongpoh, Risaw 02: Ki samla pule na Ri-lum Khasi Jaintia kiba don hapoh ka Khasi Student Union (KSU) RIST-USTM Unit hynne ka sngi Nyngkong, kila pynlong ia ka jingiakynduh lang ban pynrhem ia ka mynsiem jingiatylli bad ka jingiatreilang kum ki samla pule haba pynthymmai bad pynskhem ruh ia ki nongkitkam ba thymmai jong kane ka Unit kiban shakri na ka bynta ka samoi treikam jong u snem 2023-24.
Ia kane ka jingialang la pynshongkun da ka jingiadonlang u Education Secretary ka seng samla Pynkmen Sanmiet uba la pynskhem ia ki nongkitkam ba thymmai jong ka RIST-USTM bad pyrsut mynsiem ruh ia ki samla ba kin iaid iala ka Jaidbynriew.
Kiba la iadonlang ha kane ka sngi ki kynthup ia u President ka KSU North Khasi Hills Bah Ferdynald Kharkamni, u general Secretary samla James Hitlar Mawphniang, u Secretary ka Educaton Cell samla Toning Lapang lem bad kiwei kiwei.
U Samla Pynkmen Sanmiet, ha kaba ai jingkren, u la pynpaw ia ka jingkmen kaba khraw ban iadonlang ha ka jingkynduh lang jong ki samla pule khasi ban tip bad ithuh iwei ïa iwei kum shipara ha sawdong sawkun jong katei ka jaka pule bad ban wanrah ruh ka jingïatyli bad kyrshan iwei ïa iwei.
Une u Nongialam ka KSU u la ai mynsiem ïa ki samla pule ba kin minot thop ha ki jingpule jong ki bad ban pynim ïaka riti ka dustur haba ki don ha kano kano ka jaka, ba kin long ruh ki khlur ba tyngshaiñ haka jingim jong ki.
Ha kane ka sngi la pynkup burom ruh ia ki nongkitkam barim ka KSU bad la pynskhem ia kiban shimti ia ka lyngkor na ka bynta ka samoi treikam jong u snem 2023-24 kiba kynthup ia u Adviser la jied ia u Jefferson Phawa, President Nickson E Thabah, Vice President Richie C Lyngkhoi, General Secretary Balasumar Sohkhwai, Asst. General Secretary Dasngewmiat Kharthangmaw, Organizing Secretary Rapseibor Syngkli, Finance Secretary Bashida Kharlatang, Publicity Secretary Bakyrmen Passah, Education Secretary Chipper Lathong.
Katba na ka liang ki samla kynthei la jied ban lamkhmat da ka samla Risbun Lyngdoh kum ka Women Representative bad ia ka samla Monisha Kharnaior kum ka Assistant Women Representative nalor kiwei ki dkhot.
