Delhi Nailur 29: U President ka Khasi Authors Society (KAS) Prof. D.R.L. Nonglait ula iathuh ba ka KAS kala iakhun mynta la 40 snem tam ban pynioh jingithuh noh ia ka ktien Khasi hapoh ka Riti Synshar ka Ri haba pyntip ba kane ka mat jingdawa kala sahteng ha ka Ministry of Home Affairs (MHA) naduh u snem 2004.
U Prof DRL Nonglait ula kren ia katei haka sngi sdang jong ka National Seminar, ka Lympung Iamir Jingtip halor ka Ktien, ka Litreshor bad ka Kolshor Khasi, kaba Ar Sngi ha National YMCA Hostel kaba don ha nongbah Delhi, kaba la pynlong da ka Khasi Author Society (KAS) bad ka Hynniewtrep Delhi Association (HTDA).
Ula ong, ba ia ka KAS la seng ha 11 Nailur 1979 da ki nongthoh kiba paw ban pyniar ia ka ktien Khasi bad ka seng kala iaid shaphrang ha kaban kyntiew bad pynneh pynsah iaka ktien Khasi bad ialeh ruh ban pynioh noh ia ka jingithuh hapoh ka Riti Synshar ka Ri.
Ula iathuh ba ka KAS kala pyrshang ban pynioh iaka jingithuh lyngba ka Sahitya Akademi kaba la ai ia jingithuh ia ka ktien Khasi nalor ki ar tylli ki Award na ka bynta ki nongthoh Khasi, u Bah DS Khongdup ula ioh ia ka Award ha u snem 1998 bad u SS Majaw ula ioh ia ka Award ha u 2013.
Ula ong ba kane ka jingioh khusnam ka long ka jingithuh jongka Sahitya Akademi namar myn shwa ka Sahitya Akademi ka ju ai ka jingbthah ia kano kano ka ktien ban ithuh haka khyrnit kaba phra, hynrei ha ki snem kiba hadien, ia kane ka kam la shimti noh da ka sorkar pdeng lyngba ka Ministry of Home Affairs.
Ula iathuh ba ka KAS kala leit ban dawa na ka sorkar jylla kaba ialam da u Dr DD Lapang ha u snem 2002-2003 bad ia baroh ki Myntri Sorkar Khasi bad ki MLA Khasi ban pynlong noh ia ka ktien Khasi kum ka ‘Official Language’.
U iathuh ba dei ha u 2005, la wanrah ia ka Meghalaya Language Act ha kaba la pynlong ia ka ktien Khasi kum ka Associate Official Language jong ka jylla bad kane kadei shi bynta ban kot sha ka thong ban ioh pynrung ia ka ktien Khasi ha ka Khyrnit kaba Phra.
U pyntip ruh ba ka KAS ha u 2017- 2018 kala pynlong ia ka jingiakhih paidbah ha nongbah Shillong bad ha kylleng ka rilum Khasi-Jaintia ban kyntu iaka sorkar jylla ba kan shim ia ka Resolution ha ka ïing dorbar thawaiñ ne ha ka Kynhun Myntri, ban kyntu ia ka Sorkar Pdeng ba kan pynrung iaka Khasi ia haka Khyrnit kaba Phra bad ka Sorkar Jylla ha u 2018 kala mynjur ia kane ka Resolution ia kaba la phah sha ka Sorkar Pdeng.
“Haba ka sorkar kala phah ia ka Resolution sha ka Sorkar Pdeng, ka KAS kala leit iakynduh ha u snem 2019 ia ki Myntri ka Sorkar Pdeng kiba khmih iaka MHA kiba kynthup ia u Kiren Rijiju bad ia u Rajnath Singh. Ka MHA lyngba ka Department of Official Language, kala pyntip ha ka KAS ba ka ktien Khasi kala long kawei na ki 38 tylli ki Ktien kiba la dawa ia ka jingithuh hapoh ka riti synshar ka ri India bad ka ktien Khasi kala long ka jingdawa kaba sahteng naduh u snem 2004 hapoh ka MHA bad ka long ka jingdawa kaba dei ban ioh iaka jingithuh” ong u President ka KAS.
Katba u Convener ka HTDA, u Bah RP Warjri, ula ong, ba ka jingthmu ban pynlong ia kane ka jingialang ka long eh naka bynta ban lah pynurlong ia ka jingthmu kaba iadei bad ka jingdawa ban pynrung noh ia ka ktien Khasi haka Khyrnit kaba Phra jong ka riti synshar ka ri.
“Balei ngi don hangne ha Nongbah Delhi, ngi donkam ban jop bad ngi donkam ban sdang na ka National Capital namar ban shu sahkut ha ka jylla, ngin ym poi sha ka thong. Ngin kyntiew iaka ktien Khasi khnang ba ka Sorkar Pdeng ruh kan ithuh ia ngi. Lada ngim lah ban kyntiew ha ka National Level kumta kan shu sahkut beit, ngi donkam ban pynkhih iaka jingmut jingpyrkhat jongki nongsynshar ha Delhi khnang ba kin ai noh iaka jingithuh ia ka ktien Khasi” ong u Bah RP Warjri.
Ka jingthmu jong ka KAS bad ka HTDA ban pynlong ia kane ka jingiamir jingtip ka long ban wanrah lang ia ki riewshemphang bad ki riew wadbniah ka jaidbynriew na kylleng ka ri India ban kyntiew ia ka ktien, ka Litereshor bad ka kolshor bad shi bynta ban pynkhlain iaka jingdawa ban pynrung noh ia ka ktien Khasi ha ka khyrnit kaba phra jong ka riti synshar ka ri.
Ia kane ka jingiamir jingtip la plie da u MP ka Lok Sabha u Bah Vincent Pala kum u Kongsan, u Chairman ka KHADC u Bah Lamphrang Blah kum u Symbud Kongsan, ha kaba la iadonlang ka Myntri ka Koit ka Khiah ka jylla ka Kong Ampareen Lyngdoh, u Executive Member ka KHADC u Bah Teiborlang Pathaw, ki nongkitkam ka KAS, ka HTDA, ki riewpawkhmat ka jylla, ki nongialam jong ki sengbhalang kiba kynthup ia ka KSU, FKJGP, JSU bad ka CORP.
