Kohima, Nailur 28 : Ki pulit ka Nagaland kila sdang ia ka thma pyrshah ia u droks hapoh ka Jylla bad kala ai ka jingpynshitom haduh 43 ngut ki Pulit kiba donkti ha ki kam bymman ba iadei bad u droks.
Napdeng kine ki 43 ngut, haduh 23 ngut kila shah pynngat hapoh ki kyndon jong ka Narcotics Drugs and Psychotropic Substances (NDPS) Act 1985.
Ka jingtohkit jong ka Tnad kala dep na ka bynta ki 23 ngut ki Pulit katba ka jingtohkit ba dang sah ka long satang ia 20 ngut.
Kiwei ki Pulit ki dei kiba la shah sospon lane kiba shah bat ia ka jingpynkiew tulop ba manla u snem lane ngat ha baroh ar ki jingpynsajia. Nalor kane, kala don ruh ka jingpynhiar kyrdan ia ki katto katne ngut ki Pulit.
Kat kum ka khubor, uwei u Pulit ula phah ia ka shithi shongthait noh bad hynriew ngut kila shah weng noh na ka kam halor ka jingdonkti ha ki kam khaii droks.
“U Drok ba shongdor haduh T. 25 klur la ioh ban kurup. 133 tylli ki ejahar la register bad 157 ngut ki briew kila shah kem hapdeng u bnai Jylliew bad Nailar mynta u snem” ong ka khubor Pulit.
