Shu peitkai ki Pulit na baroh arliang mamla
Shillong, Nailur 26 : Ka Lapangap, West Jaintia Hills, kala kylla long madan thma biang hynne ka sngi da ka jingwan hiar thma ki spah ngut ki paid Karbi kiba kieng da ki Khnam ki Ryntieh bad ki Jri siat sim ia ki paid Khasi-Pnar kiba thmu leit rep.
Kane ka jingkieng da ka Ryntieh bad u Khnam ka dei kaba dang jia hynne ka sngi Ba-ar ha ka sien ba nyngkong eh naduh ba sdang ka jingiakynad hapdeng ki arliang mamla Jaidbynriew (Khasi-Pnar bad Karnbi) ha kane ka shnong Khappud kaba don markhap bad ka West Karbi Anglong.
La kynnoh ba ki Karbi na ka thain Tahpat kila wan ban pynthut ia ki Khasi-Pnar kiba leit rep leit riang naduh u bnai Nailar mynta u snem bad ki ju siat da ki jri siat sim ia ki Khasi-Pnar ban pyntieng pynsmiej. Hynrei hynne ka sngi, kila wanrah syndon da ki Ryntieh bad ki Khnam da ka jingthmu kaba kham sniew.
Dang shen, ki Pulit ka Saitsama Outpost kiba pahara ha shnong Lapangap, kila hap ban phet lailum laiwah na ka jingwan hiar thma jong ki paid Karbi kiba la siat da ki jri bad lun maw katba ki dang pahara. Kane ka jingjia kala jia ha ka 26 tarik u Nailar.
Hadien shibnai thik, kila wan kieng pat da ki Ryntieh ki Khnam bad ap sharud pynthor ban siat ia ki nongrep ka Shnong Lapangap.
Haba ioh jingtip ia kane ka jingjia, ki nongshongshnong ka Lapangap kila iamih paidbah ban iatur sha kane ka madan thma bad ha ryngkat ki jri siat sim, kila pynphai kylliang ban pyntieng ia ki Karbi ba kin ym tur.
La iathuh ba ki Pulit ka Assam bad ka Meghalaya ruh kumjuh kila poi ha katei ka jaka hynrei baroh arliang mamla kila shu long tang ki nongpeitkai ia ka jingiasiat jri. Hynrei hadien suki pa suki ynda la kham jai jai, kila tehlakam noh iala ki jong ki paidbhur.
Kat kum ka jingiathuh ki Nongialam Shnong, la ong ba ki paid Karbi kila ap ktem lypa ia ki nongrep ka Shnong Lapangap kiba leit jngoh ia ki um ba pynpoi sha ki lyngkha rep. Ki iathuh ba kine ki paid Karbi kila ap sha shiliang jong ki Pynthor bad haba iohi ia ki nongrep, kila ther naphang da ki jri siat sim kaba la neh baroh shisngi.
Ki iathuh ba ki paid Karbi kila siat ruh da ki Ryntieh sha ki paidbah bad kane ka jingjia, uwei u Pulit ka Jylla ula lait salit na ka jingshei jong u Khnam.
