Shillong, Nailur 26 : U Myntri ka Tnad PHE Marcuise N Marak ha ka sngi Ba-ar, ula pyntip ba ka Bulk Water Supply Scheme (BWSS) bala mynjur da ka Sorkar Pdeng lyngba ka North East Special Infrastructure Development Scheme (NESIDS), kan iarap bha ha kaban weng noh ia ka jingkyrduh um hapoh ka sor Tura.
Haba iakren bad ki nongthoh khubor, u Marak ula ong ba kane ka skhim hapoh ka NESIDS ka dei kaba la mynjur ha ka jingialang bala pynlong hapdeng ki Ophisar ka Sorkar India bad ka Sorkar Jylla.
“Mynta ngi kyrmen ban weng noh ia kane ka jingeh ha ka jingkyrduh um da ki paidbah ka sor Tura” ula ong.
Halor ka Tura Water Supply Scheme, u Myntri ula ong ba kane ka project kala shah ktah namar ka jingtyrkhong noh ka tyllong um ha ka por bym don slap.
“Ngi don ruh ia ka jingeh ha ka bording elektrik namar ngim lah ban pump um na ka wah Ganol. Kine ki dei ki jingeh ba hakhmat duh ba balei ngi kyrduh um ha sor Tura” ula bynrap.
