Shillong, Nailur 25 :Ka Liang Pyrshah Voice of the People Party (VPP) ha ka sngi Nyngkong, kala phah tuklar ha u Myntri ka Tnad Social Welfare Bah Paul Lyngdoh, halor ka jingbym ioh tulop ki Ophisar bad Nongtrei kiba trei hapoh ka Child Protection Services hapoh ka Jylla mynta la saw bnai.
Ha ka dorkhas bala phah sha u Bah Paul, u General Secretary ka VOO Dr Ricky J Syngkon ula ong “Ki Ophisar bad ki Nongtrei hapoh ka Child Protection Services kim shym la ioh tulop mynta la saw bnai. Nalor kata, kim shym la ioh ruh ia kiwei ki jingmyntoi ha ka dur jong ka Social Security Benefits halor kam bhalang ba kila ai ban pynthikna ia ka bha ka miat jong ki Khynnah”.
Ula ong ba la ioh jingtip ba ki daw bah halor kane ka jingduna ka dei namar ka jingbym ioh pisa na ka Sorkar Pdeng bad kawei pat ka daw ba pynlong ia kane baroh ka dei ka jingbym don jingkitkhlieh jong ka Tnad Social Welfare ban pynbiang ia ki jingdonkam baroh ha kaban lah pyntreikam thikna ia ka skhim.
“Namar kata, kane ka dawa ia ka jingtuklar ba mardor jong phi bad ban lei eiei halor kane ka kam kaba sngewkhia jur bha na ka bynta ki Khynnah bad ki Nongtrei jong kane ka Ophis” ong u Dr Syngkon.
Une u Nongialam ka VPP ula ong ba ki jingbymbiang bad jingduna ha kane ka Ophis jong ka Child Protection Services kala ktah jur ia ka jingtreikam jong kane ka Ophis.
