Nongpoh, Nailur 24 : Haduh 10 ngut ki samla pule Khasi kila ioh ia ka gold medal naka Assam Don Bosco University ha ka jingpynkup burom ia ki 1286 ngut ki samla kiba la pyndep ia ki jingpule ha ki lain pule bapher bapher.
Kine ki samla kiba la ioh ia ka gold medal ki dei u samla Bijakson Marbaniang (B.A. Philosophy, CGPA 9.27), Balasuklang Khyriemmujat (M.Sc. Chemistry, CGPA 9.02), Daphisha Shongwan (M.Sc. Mathematics, CGPA 9.06), Diana Sumer (M.A. Economics, CGPA 9.04), Baiaiphyrnai Nongkhlaw (M.A. Public Administration, CGPA 8.64), Ranisha Syiemlieh (B. Tech CVE, CGPA 9.35), Veeralana Veema Syngkon (M.Com., CGPA 8.58), Bapynshngainlang Nongkynrih (MCA, CGPA 8.70).
U Samla Dapborlang Rynjah (M.Sc Bioscience) ula ioh ia ka ‘Father Mavely Gold Medal’ bad ka Samla Dorothy Roy Tariang kala ioh ia ka Gold Medal halor ka jingioh topper ha ka MBA Programme.
Ka Skulbah Don Bosco University, ka la pynkup burom haduh 1286 ngut ki samla bad napdeng kine, 555 ngut ki la ioh pdiang ia ka Bachelor Degree ha ka tnat pule Engineering, Basic Sciences, Commerce, Management, bad Humanities; 731 ngut ki la ioh pdiang ia ka Master degree ha ki tnat pule bapher bapher jong ka Engineering, Science, Commerce, bad Management. La pynkup burom ruh la 23 ngut ki samla pule kiba la ioh pdiang ia ka Doctoral Degree.
Ha kane ka jingpynkup burom, ia ki takma ksiar (Gold Medal) la sam sha ki samla pule kiba wan shakhmat eh ha ki jingpule jong ki bad ioh ia ka CGPA kaba heh tam napdeng ki samla ba ïa pule lang.
Ia kine ki khusnam la sam da u Lat ka Jylla Assam u u Gulab Chand Kataria ha ka jingiadonlang ruh u Vice Chancellor, Fr. (Dr.) Jose Palely; u Pro Vice Chancellor, Fr. Joseph Nellanatt; ki Director, ki nonghikai, ki khynnah pule bad kiwei ki riew shemphang.
