Shillong, Nailur 24: Ka Dorothy Roy Tariang, kaba na Jowai kala ioh iaka Gold Medal kum ka Topper ha ka MBA programme jong ka Assam Don Bosco University, ha kaba kala ioh 9.29 na ka 10.0 ha ka Cumulative Grade Point Average (CGPA).
Ka samla Dorothy kadei ka khun jong ka Dr Iwbih Nylla Tariang, ka heh ophisar jong ka tnad Veterinary bad u Dr Anirban Roy uba dei u nongthoh khubor kiba na ka shnong Mynthong Jowai.
Ka Dorothy Roy Tariang kala pyntbit ialade haka Human Resource Management.
Kane kadei ha ka sien kaba nyngkong eh ba ka samla kynthei na Meghalaya kan long ka Topper ha ka MBA programme jongka Assam Don Bosco University.
Ka Dorothy kala iohpdiang ia katei ka khusnam Gold Medal ha ka Convocation kaba 12 jongka Assam Don Bosco University, kaba la long ha ka sngi Saitjañ ha Tapesia Campus hajan Guwahati.
Halor kane ka jingioh kheit ia u soh ka jingjop, ka Dorothy kala ong, ba ka kwah ban trei na ka bynta ban kyntiew iaka roi ka par jong ki paidbah ka Meghalaya.
Hashwa ban pulie ia ka MBA programme jong ka Assam Don Bosco University, ka Dorothy kala pyndep iaka Graduation ha ka English Literature na ka Amity University.
U Lat ka jylla Assam u Gulab Chand Kataria, uba long u Visitor jongka Assam Don Bosco University, kum u kongsan ula sam ia ki khusnam sha ki samla pule kiba la wan shakhmat ha ki jingpule.
Ha kane ka sngi la ai Gold Medal ia ki 36 ngut ki samla pule kiba la ioh marks heh tam katkum ka Cumulative Grade Point Average ha man la ki prokram bad ki kyrdan bapher.
