Shillong, Sep 23: Ka jinglah u Lensbirth N Marak ban kamai 41 run kala iarap iaka East Garo Hills District Cricket Association ban pynliem da 12 run iaka Tura DCA ha ka Zone 2 jongka Meghalaya Cricket Association’s U-19 Boys Inter District Cricket Tournament kaba la long hynne ka sngi.
Hynrei kala don pat ka jingdiaw ha ka jingialehkai ha Umbuda, Nongpoh, hadien ka jingialehkai bha jong ka East Jaintia Hills DCA bad ka Shillong Cricket Association B kala shah pynthud noh ha u slap bad ha kane ka jingiakhun haka Zone 1 Group A match ym shim la ioh iaka resol.
Ha ka jingiakhun haka Zone 2, ia ka jingialehkaila pynduna noh da 10 Over, hynrei kane ka jingiakhun kala iaid beit khamtam haba la sakhi ba ki jingiakhun ar tylli kiba shakhmat kila shah pynthud noh ha ka mariang ha Salpara, Mendipathar.
Hynne ka sngi, la sakhi ba ka EGH kala tied nyngkong bad kala kamai tang 57 run bad hap 7 wiket, u Lensbirth ula kamai 41 run na ki 30 ball bad kane ka jingkamai run ka jongu kala long kaba kongsan bha ha kaba kiwei pat ki para nongialehkai kim shym la lah ban kamai bun run eiei.
Ki nongkawang bol jong ka Tura, kiba kynthup ia u Fernando Barbaryo M Sangma ula ioh 2 wiket bad ai tang 4 run, u Lensbirth uba la lehkai marwei ban kamai bun run ula ioh iaka khusnam Player of the Match.
Ka Tura kaba la tied baar kala ioh kamai tang 45 Run bad ha p 6 wiket ha ka 10 Over. U Harshit Prasad ula kamai 14 run bad ym shim la out, u Jeristho ula ioh 2wiket bad ai 7 run bad u Paisal Ali ula ioh 2 wiket bad ai 13 run.
Ha kawei pat ka jingiakhun, la sakha ba ka EJH kala tied 9 run ha ka shi Over bad kamai haduh 271 run bad hap 8 wiket haka 30 over.
U Amarjeet Gupta ula ioh 56 run na ki 61 ball bad u Jeffre Chyrmang ula kamai 38 run na ki 30 ball.
Nalor kane u Luckystar Dhar ula kamai 56 na 49 ball bad u Peterson Sangma ula kamai 40 run tang na ki 18 ball, katba na ki nongkawang ball u Bishes Chetri jongka SCA-B ula ioh 2 wiket bad ai 27 run.
Watla ka jingkamai run ka EJH kala long kaba heh bha, hynrei ka SCA-B hynrei ki nongtied jongka SCA-B kila kamai 46 run na ka 5.3 Over bad ha kane ka por kala slap noh.
U Shubham Rasaily ula kamai 33 run na 23 ball bad u Manthan Dey u la kamai 9 run na ka 10 ball bad kine ki nongtied kim pat out.
Ka jingiakhun haka lah sngi u Blei kan long hapdeng ka West Khasi Hills DCA pyrshah iaka West Jaintia Hills DCA ha ka Zone 1 Group B.
