Shillong, Nailur 21: Ka jingshisha kala mih pyrthei mynta ba ka jingkynnoh u Myntri Rangbah barim ka Jylla Dr Mukul Sangma ba u Myntri Rangbah ka Jylla Conrad K Sangma u don ka jingiadei ba iajan bad u Kingpin khaii droks ka Mizoram tangba iashondur lang, ka dei ka bym don nongrim satia bad ka dei tang ka jingthmu pynthohbria.
Une u briew ba shah kynnoh ‘Kingpin’ khaii droks u dei u Henry Lalremsanga, ia uba ka Iingkashari Special Court, NDPS kala pynksan ba um dei satia u nongkhaii drok naduh u snem 2018. Kane ka hukum ka dei kaba la pynmih da ka Iingkashari u Sukesh Kumar, Special Judge, NDPS ha ka 21 tarik Rymphang, 2018.
U Henry lem bad arngut kiwei pat kata u Manish Singh bad u Arvind Ahuja, kila shah kem ha ka 23 tarik Iaiong, 2013 ha ba iadei bad ka jingioh kurup ia u dawai kuli pseudoephedrine bala khein beain, uba shongdor haduh T. 6 klur.
Ka kynhun tohkit kala ioh kurip haduh 1,51,680 strip u dawai pseudoephedrine katba dang kit ia une u dawai na GK sha Mahipalpur.
Hynrei ha ka hukum ba 21 tarik Rymphang, 2018, u Special Judge, NDPS ula ong “Ha kane ka mukutduma la shem ba une u nongdie bad u nongthied ki dei kiba la don ia ki drug licence bala ai da ki bor ba dei khmih, kumta ka kaiphod pynshisha jong u IO kala pyni ba ia ka consignment note la dep ban pynkhreh bad la phah beit beit sha nongthied DP Enterprises. Ia ki kot ki sla jong kine ki dawai la dep ban pynshisha bad ia ka kaiphod ruh la dep ban aiti. Namar ka jingshisha ba ka jingshna ia u dawai pseudoephedrine kam dei kaba la jied ban the kyndon da ka Sorkar India kat kum ka NDPS (Regulation of Controlled Substances) Order 2013 bad ia ka Schedule bala kdew haneng, kumta kine ki briew ba kynnoh (accused) kim shym la pynkhein satia ia kano kano ka kyndon jong ka NDPS Act”.
“Baroh kine ki laingut kiba shah kynnoh ha kane ka case, ki khlem pynkhein ia kano kano ka kyndon jong ka Act bad ki don ka hok ban lait noh na ki jingkynnoh pyrshah ia ki. Namar kata, baroh kine ki laingut ki dei ban lait noh” ong ka hukum.
Ha ka sngi Ba-ar, ka Iingdorbar Thaw Ain ka Jylla kala thnem na ka jingsei u Nongialam ka AITC Dr Mukul Sangma ia ka dur jong u Myntri Rangbah Conrad K Sangma ba iashonlang bad ka kurim lem u Henry ha kawei na ki jingialang bah eh ha new Delhi. Ula kynnoh ruh ba u don ka jingiadei ba iajan bad u Henry uba dei u Kingpin khaii drok.
Ha ka sngi Balang, u Lamphang ka Iingdorbar Thomas A Sangma ula hap ban weng noh ia ka jingkren u Dr Mukul na ka jingbuh jingthoh jong ka Iingdorbar ia ki mat iatai jong ka Iingdorbar namar ka dei ka jingpynkhein ia ki Rules.
Haba pynksan iala ka nongrim, u Dr Mukul ula ong “Une u briew u dei uba la paw ha ki lad pthai khubor ka Ri (National Media) u dei u ba shah kynnoh khaii drok ym uba la shah pynngat. Nga khlem kynnoh ba ula leh ia kano kano ka kam bymman da kaba kdew ia kaei kaba paw na ka dur. Ka jingkren jong nga ka long ba ngi hap ban husiar, ngi hap ban phikir bha ia ki briew ba ngi don jingiadei katba ngi dang bat ia ka shuki, ka shuki kaba la pynkupbor da ka riti synshar ka ri”.
Haba pynpaw ia ka jingsngewkhia ba ula shah jer kyrteng ha ki jingiatai ki bym don jingmut, u Myntri Rangbah Conrad K Sangma ula kyntu ia u Nongialam ka AITC (Dr Mukul) ban wanrah ia ki jingshisha halor kane ka case.
“Ai ba u dkhot (Mukul) un wanrah ia ka jingshisha halor kane ka case, mynno kane ka case ka jia, kaei kaba long ba man mynta” ula ong.
“Hato u tip ba kane ka case ka dei shaphang kaei?, hato u tip ba kane ka case kala dep kut?. Hatp u tip mo ba ka Iingkasahri kala dep ai ia ka rai halor kane ka case bad une kine ki briew kila laitluid…Ai ba un wadbniah halor kane bad ai ba un wad?” ula ong.
