Imphal, Naipur 21: Ka jingiakynad kala kyan biang ha kiba bun ki jaka jong ka Jylla Manipur kynthup hapoh ka Nongbah Imphal namar ka jingshah kem ki 5 ngut ki briew ryngkat bad ki tiar siat ha ka 16 tarik Nailur.
Kane ka jingkem ia kine ki briew ba kynthup ia uwei uba dei u dkhot barim ka kynhun kiengatiar PLA, kala lam sha ka jingiakhih ha kylleng ki jaka lum jong ka Jylla, kiba dawa dei ban pyllait noh mar mar khlem ka jingteh kyndon ia kine ki 5 ngut.
Kum shibynta na ka jingiakhih, ki kynhun sengbhalang kila pynlong ruh ia ka jingkhang shnong ba 48 kynta ha ki jaka lum ka Jylla naduh ka miet sngi nyngkong.
Shuwa kane ka jingpakhang shnong, ki kynthei kila iamih paidbah ban iatur sha ki Police Station ha baroh ki 5 tylli ki Valley District ka Jylla ban dawa pyllait noh mar mar khlem teh kyndon ia ki 5 ngut kiba shah kem lem kumta ki Pulit ki dei ruh ban kem ia baroh ki Kynthei namar ki ruh ki dei ki nongiada ia ka shnong ka thaw.
Ha ki katto katne ki jaka, ki nongiakhih kila iapynibor ruh bad ki Pulit lem bad ki bor pahara kaba la pynlong ia ki Pulit ban bom da ki lathi bad siat tyngdong lyer pynsat khmat sha ki paidbah kiba la tur paidbah sha ki Police Station. La iathuh ba bun ngut kila mynsaw ha kane ka jingjia.
Namar kane ka jinglong jingman, ki bor Disrict kila weng noh ia ki kyndon pynjynsur ia ka korphiw bad kala pynjari biang ia ka kyndon 144 CrPC.
