Shillong, Nailur 19 : U MLA ka Congress na Umsning Dr Celestine Lyngdoh ha ka sngi Ba-ar, ula pynpaw ia ka jingsngewkhia halor ka jingpynslem ia ka jingker bad ka jingtei ia ka Building jong ka Patharkhmah Civil Sub-Division.
Haba wanrah ia kane ka mat hapoh ka kynta kylli jingkylli ha Iingdorbar Thaw Ain, u Dr Celestine ula ong ba ia ka jaka la ai sngewbha sha ka Sorkar ha ka por ba ka Patharkhmah ka dang dei tang ka Administrative Unit. Hynrei wat hadien 15 snem bala lah, ym pat don uwei ruh u paia bala pynieng da ka Sorkar Jylla.
“Namar kane, kala don ka jingkyntur pud bad ka jaka bala ai sngewbha sha ka Sorkar kala nang rit nand rit katba dang iaid ki sngi” ula ong haba kyntu ia ka Sorkar ban pynieng paia noh lada kam pat lah ban ker noh kham kloi ia ka jaka.
Kat kum ka jingong jong ki, ki Ohisar kila leit treikam tang arsien ha ka shitaiew.
“Namar kata, ngi kyrpad ia ka Sorkar ban pynthikna ha kaban tei noh kham kloi ia ki jingker bad ia ka building na ka bynta ka Civil Sub Division” ula ong.
Haba jubab, u Myntri ka Tnad General Administration Rakkam A Sangma ula iathuh ba 11.864 acre ka jaka la ai sngewbha sha ka Sorkar ban tei ia ka building jong ka Civil Sub Division bad pyntip ba ia mynta kane ka Sub Division ka dang treikam shipor na ka Ophis u SDO, PHE.
“Ka Tnad kala shim mynta ia ka sienjam ban tei noh ia ka building ba shirta lem bad ka jingker” ula bynrap.
