Nongstoiñ, Nailur 13: Ka FKJGP-Mawshynrut Circle kala dawa ia ka Sorkar Jylla ba kan pyntreikam pura noh ia ka Mawshynrut Civil Sub Division kumba long kiwei pat ki Civil Sub Division ka Jylla, ban lah pynurlong shisha ia ka thong ban pynpoi shajan ia ka jingshakri sha jong u paidbah.
Kane ka jingdawa kala mih hadien ka jingshem ba kane ka Civil Sub Division, kaba la kynjoh hynriew snem naduh ba plie ia ka, kam shym la don wat tang ka Ophis treikam lajong khlem da iakren ia ki Tnad Sorkar khamtam ki Tnad kiba dei ban pyntreikam ia ki Welfare Scheme ne ki skhim ai jingmyntoi ia u paidbah.
Haba iakren bad ki nongthoh khubor, u General Secretary ka FKJGP-Mawshynrut Bah Eveningstar Myrthong ula iathuh ba kane ka Civil Sub Division haduh mynta ka dang treikam ne pynlong Ophis ha ka PHC barim ha Riangdo.
“Kane ka Civil Dub Disvision ka dang dkoh ha kiba bun ki liang. Bun ki Tnad Sorkar kiba dei ban don ha kane ka Sub Division kim pat don satia naduh ka Election Branch, Supply, SDSEO bad kiwei kiwei” ula ong haba bynrap “Kane kala buh ia ki paidbah ha ka jingeh kaba khraw namar ia baroh ki kam ki dang hap ban wan pyndep sha Nongstoin.
Une u Nongialam ka FKJGP ula pyntip ba ka Seng kala leit iakynduh ia u Deputy Commissioner ka West Khasi Hills bad pynkynmaw ia u ba un pynsngew lem ia kane ka jingdawa sha ka Sorkar ba kan wanrah noh ia baroh ki Tnad Sorkar ha kane ka Civil Sub Division khnang ba kan pynsuk ia ki paidbah ka thain.
Ula pyntip ba ha kane ka jingiakynduh, la pynkynmaw ruh ia u Deputy Commissioner halor ka jingbym pat treikam ka Shallang C&RD Block, kaba la jan dap shisnem mynta naduh ba wan plie u Myntri Rangbah ka Jylla Conrad K Sangma ha u bnai Naiwieng 2022.
U Bah Eveningstar u iathuh ba kane ka Block haduh mynta kam pat don satia ia u Block Development Officer (BDO) bad ki paidbah kiba trei bylla shispah sngi na ka skhim MGNREGS, ki dang hap ban leit pyndep ia ki jingdonkam baroh sha Riangdoh Block.
Ha kajuh ka por, ka FKJGP kala dawa ia ka Sorkar ba kan plie noh sa kawei lane artylli ki Bank ha Shallang, khnang ban pynsuk ia ki paidbah kiba kynshew pisa bad kiba trei kam bylla shispah sngi namar ka jingshem jingeh palat ban leit shaduh Riangdo.
