Shillong, Nailur 13 : U Myntri Rangbah ka Jylla Conrad K Sangma, ha ka sngi Balang ula ban jur ba ka Sorkar jong u, kala buh ia ka kam pule dangle ha ka lynti ka jingpynbeit ba janai hadien ba la pyniaid lait ia ki nongrim bala thmu la 50 snem.
Haba kren ha ka jingialang pyndap pyrda ia ka jingrakhe dap 100 snem ba la pynlong shisnem lynter jong ka Laban Bengali Higher Secondary School, u Myntri Rangbah ula ong ba rukom pyntreikam ia ka kam pule dangle (Education System) kala iiad lait na ki nongrim bala thmu kaba dei ka bha ka miat bad ka lawei jong ki Khynnah pule, ha kine ki 50 snem bala leit noh.
“Hynrei ka Sorkar jong nga, kan pynthikna ba baroh ki rai bala shim kan buh hakhmat eh ia ka bha ka miat jong ki khynnah pule” ula ong.
“Nga lah ban ong da ka jingsngewshkem b aka kam pule dangle ka dei kawei na ki kam ba hakhmat eh jong ka Sorkar bad ka Sorkar kala wanrah ia ka policy jong ki khynnah pule ban pynbiang ruh ia baroh ki jaka pule hapoh ka Jylla” ong u Conrad ha ka jingialang kaba la iashimbynta ruh da u Myntri ka kam Pule Dangle Rakkam A Sangma.
Haba kren halor ka jingbun jyrwit jyrwat ka kam pule dangle ha Meghalaya, u Conrad ula ong ba ka Jylla ka don ia palat 55000 ngut ki Nonghikai bad jan kot 15000 tylli ki skul bad jaka pule. “Ki jingeh ban pyniaid ia ki skul ha ryngkat ka jingbym biang tarajur hapdeng ki Nonghikai bad ki Khynnah, katto katne kiba don tang khyndiat ki khyndiat hynrei bun ki nonghikai bad don ruh kiba bun ki khynnah bad khyndiat eh ki nonghikai, ka dei kawei na ki jingeh kiba don ha ka kam pule dangle ha Jylla”.
“Kane kan pynbor ia ka Sorkar ban hap shim ia ka rai ba tyngeh ha kaban pyniaklop lang noh lane khang noh ia ki jaka pule ki bym treikam” ong u Conrad haba bynrap “Kila don bun ki jingkylla hapoh ka Tnad Pule Dangle ha kine ki san- hynriew snem bala leit noh bad kine ki jingkylla ki dei eh n aka bynta ka bha ka miat jong ki khynnah pule”.
U Myntri Rangbah ula ong “Ka song pisa ka Sorkar bala mang sha ka pule ka dangle hateng la ju pyndonkam bakla noh tad haduh kine ki snem bala leit noh hynrei mynta ngi la bthah ia ki ban shna pynbha noh ia baroh ki jingtei jong ki skul Sorkar”.
U Conrad ula pyntip ruh ba ka ongpisa bala lum na ka bynta ka pule ka dangle kala nang kiew ha ka jingbym pyndonkam tad haduh u snem 2019 bad bynrap ba kane ka Sorkar ba mynta kala bthah ban pyndonkam ia kane ka song pisa bala lum ha ka dur jong ki khajna, sha ki kam maramot bad shna ia ki jaka pule ki ban pynmyntoi shikatdei eh ia ki skulk a Sorkar ha kylleng ki jaka jong ka Jylla.
U Myntri Rangbah ula kyntu ruh ia ki Khynnah pule ba kin long kiba adkar bad bat por bha ha ka jingpule haba ban jur ia ka jingkongsan ha ka jingim shimet bad ha ka trei ka ktah bad bynrap b aka jinglong adkar bad batpor ka long kaba kongsan bha ha ka jingim naba ka por dei ka spah bah.
Haba kren halor ka NEP-2020, u Myntri Rangbah ula kren bniah bha halor ka jingdonkam ba ki College kin tyrwa ia ki jingpule ha ki course bapher bapher, ban thung shuh shuh ia ki nonghikai bad ki jingtei ha kaba ka pisa kaba donkam baroh kan kot haduh T. 400-500 klur.
U Myntri Rangbah ula shim kabu ruh ban pynbna ia ki katto katne ki project kam pynroi ban sa pyntrei ha Jylla kynthup ia ka Secretariat ba thymmai, ki Parking Lot, ki Community park, ki Ropeway System haba pyntip b aka Sorkar kala kut jingmut ban wanrah ia ki kam pynroi ha baroh ki liang nalor ban ai jingkyrshan ia ki kynhun bapher bapher ha ka imlang sahlang ba kynthup iaki Nongrep, ki Seng Kynthei bad ki Nongsengkam sengjam.
Haba pynkynmaw ia ki kyntien u (L) PA Sangma haba ai jingkren, u Myntri ka kam Pule Dangle Rakkam A Sangma ula ong b aka spah bah lane ka nongkynti kaba ngi lah ban ai sha la ki Khun ka dei ka jingnang jingstad. “Ka Jingnang jingstad ka dei kaba spah ba kordor tam ba ngi lah ban ai sha ki Khun, ka Jaidbynriew bad ka Ri bad nga ngeit ba ha kine ki 100 snem bala leit noh, kane ka skul kala lah ban leh ia kane na ka bynta ki hajar ngut ki briew kiba la bat ia ki kyrdan bapher bapher ha ka imlang sahlang”.
Shuwa kane, u Myntri Rangbah ula pynkup burom ia ki Khynnah ka Skul kiba wan shakhmat eh ha ki eksam ka MBOSE bad pyllait ruh ia ka jubilee souvenir bad ka kot bala pynbeit da u President ka Managing Commttittee jong ka skul.
