Shillong Nailur 13: Ki Myntri Rangbah ka Assam bad Meghalaya Himanta Biswa Sarma bad Conrad K Sangma lem bad u Chief Executive Member (CEM) ka Karbi Anglong Autonomous Council (KAAC) Dr Tuliram Ronghang, hynne ka sngi Balang, kila iaplie lang ia ka Karbi Hemtun (Guest House) bad buh ruh ia u mawnongrim ban tei ia ka Hostel ki samla pule ba 100 jingthiah-cun Commercial Building ka KAAC ha Shillong.
Haba ai khublei ia ki paidbah ka Karbi Anglong, u Myntri Rangbah ka Jylla Conrad K Sangma ula ai ka jingiaroh ia ka jinglah ban plie ia ka KArbi hentum bad ka jingsdang ban tei ia ka hostel 100 jingthiah. Ula ban jur halor ka jinglong kyrpang kane ka jingtei ka KAAC ka ban nang wanrah ia ka jingiadei ba iajan hapdeng ka Meghalaya bad Assam.
Ula shim kabu ruh ban kren halor ka jingkut jingmut jong ki artylli ki Jylla ha kaban iapynbeit noh ia ki jaka ba don hapdeng ka jingiakajia pud hapdeng ki artylli ki Jylla, da ka jingiasngewthuh jingmut.
U Conrad ula kren ruh halor ka jingriewspah ka riti dustur jong ki paid riewlum bad ki Jaidbynriew ha ka thain Shatei Lam Mihngi haba pynpaw ia ka jingkyrmen ba kan don ka jingiadei kaba khlain hapdeng ki jaidbynriew ka thain.
Haba iaroh ia ka jinglong Nongialam u Myntri Rangbah Himanta Biswa Sarma uba la pynthikna ia ka jingsam kam pynroi ba mar katjuh ha kylleng ki bynta ka Assam, u Conrad ula ong “Ha ka Jylla Assam, baroh ki Imlang sahlang bad baroh ki thain bad ki Jaidbynriew kila ioh ia kajuh ka jingkyrshan bad jingphaikhmat ba ki dei ban ioh n aka Sorkar”.
U Myntri Rangbah ka Assam Himanta Biswa Sarma ula pynsngew ia ka jinglong kyrpang kane ka sngi. “Mynta ka dei ka sngi ba kongsan bha ha ka histori jong ngi”. Ula ai khublei ia ka KAAC halor ka jinglah ban plie ia ka Karbi Hentum, ka Guest House ka ban ai ka jingshakri ia ki paidbah na Karbi Anglong kiba wan sha Shillong.
U Sarma ula ai khublei ruh ia u Myntri Rangbah ka Jylla Meghalaya Conrad K Sangma, halor ka jingiadonlang ha kane ka sngi ryngkat bad u, kaba pyni ia ka jingdon mynsiem ban iatreilang hapdeng ki artylli ki Jylla.
