Shillong, Nailur 12: Ka Voice of the People Party (VPP) kaba don ha ka Liang Pyrshah hynne ka sngi Ba-ar, kala dawa ban pynjlan kham bun sngi iaka Dorbar Synshar ka ban sdang naduh 15 tarik mynta u bnai.
Haka shithi sha u Lamphang ka ïing dorbar thaw ain Thomas A Sangma, u Parliamentary Secretary ka VPP bah Heavingstone Kharpran ula ong “Ka Party ka dawa naka ophis jong phi ban pynjlan sa katto katne sngi iaka dorbar synrai”.
U bah Heavingstone ula pynpaw baka Parliamentary Party jong ka VPP haka jingialang bala pynlong haka 31 tarik Nailar, kala iakren halor ki mat ba ktah iaka bha ka miat ka jylla bad kum ka Party ka kwah ban iathir ia kine ki mat hapoh ka ïing dorbar daka ba wanrah iaki Motions, Resolutions bad Questions.
“Hynrei ngi pynpaw ka jingbym sngewiahap halor ka rai jong ka BAC ban pynlong dorbar tang 5 sngi namar kane ka long kaba lyngkot palat” ong u bah Heavingstone.
Lah ban kdew ba ka BAC kala mynjur iaki sngi ban pynlong iaka dorbar synshar haka 30 tarik Nailar bad ha kane ka sngi ka BAC kala rai ruh ban buh por 3 sngi naka bynta ban iakren ia ki kam ka Sorkar bad 2 sngi ia ki kam jong ki Dkhot ka Iingdorbar.
