Shillong, Nailur 11: Ka Jaintia Students Union (JSU) hynne ka sngi Nyngkong, kala iakynduh ia ka Myntri ka Koit ka khiah Kong Ampareen Lyngdoh bad ujor pyrshah ia u Ayush Kumar haba dawa ba ym dei ban ailad ia une u bar Jylla ba yn leit pule iaka MBBS na ka bhah jong ka jylla.
Katkum ka kyrwoh na u General Secretary ka JSU samla TR Suchen, la iathuh ba ka JSU sengkmie bad ka JSU Khliehriat Circle ryngkat bad ki nongialam shnong Thangskai, kila iakynduh ia ka Myntri ka tnat ka koit ka khiah ka Kong Ampareen Lyngdoh bad la ai daka shithi ujor ia ka sorkar jylla halor ka jingpynrung kyrteng ia u Ayush Kumar ha ka thup pule MBBS.
“Ka Myntri kala pynpaw ba ka sorkar kala pdiang iaki kot ki sla kaba lah phah na DC office bad shem ba u Ayush Kumar u lah ai da ka PRC kaba ula ioh na DC office ha u snem 2021. Ka la ong ruh ba dei ban pan jingshai bad ujor ha u DC ka East Jaintia halor ka jingai PRC ia une u bar jylla” iathuh u Bah Suchen.
Ula ong, ka seng kala dawa na ka sorkar ba da lei lei ym dei ban ailad ia u Ayush Kumar ban leit pule MBBS namar kat kum ka jingtip, une u briew um dei satia u nongshong shnong ka Thanskai bad ka seng ryngkat bad ki nongialam shnong kin sa leit ban kynduh ia u DC bad tih bniah halor ki kot ki sla jong u Ayush Kumar.
Ula ong ba lada shem shisha ba une u bar jylla u leh thok, ka seng kan ym ailad ia u bad ka sorkar ka dei ban pynduh shi syndon iaka seat MBBS kaba la mang ia u.
“Ka seng ka phah ruh iaka kyrwoh kaba shai sha baroh ki nongialam shnong jong ka ri-lum Jaintia bad sha baroh ki nongialam shnong ka Bri u Hynniewtrep ba kim dei shuh ban ai syrnot lane kino kino ki NOC iaki bar jylla khlem da tih bniah la kine kiba pan syrnot ki dei hok ne em ban ioh iaki kot na shnong na thaw” pynkut u nongialam ka JSU.
