Nongpoh, Nailur 2: Ki samla pule ka Twipra Students Federation, Union Christian College Unit, Umsaw khwan kila pdiang sngewbha ia ki samla pule ka Tripura ba dang shu wan thymmai hynne ka 2 tarik Nailur.
Ia kane ka jingialang pdiang la pynlong ha Auditorium Hall jong ka UCC College, ia kaba la pynlong da ka jingthmu ban wanrah ia ka jingiadei kaba iajan hapdeng ki samla pule bala rim bad kiba dang wan thymmai.
La pynshongkun ia kane ka jingialang da ka jingiadonlang u General Secretary ka KSU samla Donald Thabah, u Maharaja Pradyot Bikram Kishor Manikya Bahadur, Manav Debarma ki MLA jong ka Golaghati Assembly Constituency, Biswajit Kalai MLA ka Katarjala Assembly Constituency, Dr Surajit Debarma, Senior Medical Officer Nazareth Shillong, Umashankar Debarma MDC, TTADC, u Vice Principal ka UCC, Richard Tripura President, Johan Reang General Secretary lem bad kiwei kiwei.
Haba kren ha kane ka sngi, kum u nongshah khot kyrpang, u Samla Donald Thabah, u la phriang ia ki kyntien shongsbai halor ka jingdonkam ban don ia ka jingieid jingiatylli bad ka jingiatreilang da kawei ka jingmut para samla pule khamtam kiba wan pule ha kane ka jylla naduh ka jylla Tripura na ka bynta ban shngain ka lawei jong ki para samla.
U la ong ruh, ba kane ka juk kaba mynta ka long shisha kaba eh bha bad ka don jingma lada kum ki samla pule kim don ia ka jingiasngewthuh jingmut para samla pule kiba wan na ki jylla bapher bapher, da kaba bynrap ruh, ba kane ka jylla Meghalaya ka dei ka jylla kaba ieid ia ka jingshongsuk shongshngain bad kaba don ia ka jingiatylli kumta kum ki samla pule kiba wan na Tripura ruh kin peit ia ka nuksa babha ban ia tylli bad ban minot ruh pat ha ki jingpule ka jong ki.
La pynphuh pynphieng ia kane ka prokram lyngba ki prokram ia shad ia rwai bad ka jingai sngewbha ia ki samla pule kiba dang shu wan ban sdang ia ka jingpule na ka jylla Tripura ha kane ka jaka pule bna nam ka jylla Meghalaya.
Pule ruh: Kurup ka ANTF ia u droks ba shongdor T. 6 klur na Shillong, kem 4 ngut
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
