Shillong, Nailur 01: Ka Sorkar Assam lyngba ka tnad Forest, kala leit ban kyndang jubor ia ki paid Khasi-Pnar kiba shong ba sah ha ki shnong Khasi ba la don da ki spah snem, kiba hap hapoh ka Pahar Line jong ka Cachar District.
Kane ka jingleit kyndang ia ki paid Khasi-Pnar kala jia ha ka sngi Palei kata ha ka 31 tarik Nailar 2023. Kane ka jingthombor ka Sorkar Assam kala jia ha ki shnong Khasi bala tip kum ka Durgacherra, Durbintilla bad Dabinalla.
Kat kum ka khubor bala ioh lum, la iathuh ba ki bor District ka Cachar naduh u Superintendent of Police ka District, u Officer Incharge ka Borkhola, u DFO ka Tnad Forest, kila ialam ia kane ka jingkyndang ia ki shnong khasi.
Kat kum ka jingiathuh ki trai shnong, kine ki Shnong kila don palat 100 snem bad ki dei kiba la ioh ruh ia ka jingithuh kum ki Revenue Village hapoh ka Silchar Sadar Circle. Kine ki Shnong kila ioh ruh ia u Rangbah Shnong bala ai jingithuh da u Deputy Commissioner ka Cachar naduh ki snem 1954 ter ter.
Ki iathuh ba ka Tnad Forest kala wan kam jubor ia ki jaka jong kine ki Shnong bad kala air uh ia ka Eviction notice ia ki 7 tylli ki Shnong.
Na ki video bala saphriang paidbah, la iohi ia ka jingiatai nia kaba jur hapdeng ki Heh Pulit ka Assam bad ki paid Khasi-Pnar kiba dei ki trai Shnong ka thain.
Ka don ruh ka video kaba pyni ba ki briew ka Sorkar Assam kila leit pynngat lut ia kiba bun ki jingthung jingtep kynthup ki diengkwai ha ki bri jong ki paid Khasi-Pnar.
Na ka liang ki Rangbah Shnong jong kitei ki Shnong Khasi kila leit ban mudui da ka mukotduma sha ka Iingkashari.
Pule ruh: Manipur: Pynrem jur ka ZCSC ba thombor ki paid Zo ka Lamka
PEIT:
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
