Leit tynruh ki Nonghikai Deficit ia u CM ban pyntreikam noh ia ki jingdawa

Shillong Nailar 23: Ki Nonghikai skul kiba don hapoh ka lama jong ka Khasi Jaintia Deficit School Teachers Association (KJDSTA) bad ka Garo Hills Deficit School Teachers & Employess Association (GHDSTEA), hynne ka sngi Balang kila iakynduh ia u Myntri Rangbah ka jylla Conrad K Sangma, ban buddien halor ki mat jingdawa kiba ka sorkar jylla ka dang pynsahteng haduh mynta.

Ha ka dorkhas kaba la aiti da ki nongialam ka KJDSTA bad GHDSTEA ha u Myntri Rangbah, kila pynpaw iaka jingeh kaba ki nonghikai ki iakynduh man la ka por.

“Ha kaba iadei bad ka Death Cum Retirement Gratutity (DCRG) kaba T.10 Lak, ka kynhun Myntri kala ai ia ka jingmynjur ia kane ka jingtyrwa jong ka tnad pule puthi, hynrei haduh mynta ka tnad Pla Tyngka ka dang bat ia kane khlem kano kano ka daw. Namar ba phi khmih hi dalade iaka tnad Pla Tyngka, kumta ngi kyrpad ba phin khmih leh noh ia kane ka kam bad ban pynthikna ba dei ban pyntreikam noh” la pynpaw haka dorkhas kaba la soi da ka President jong ka KJDSTA ka Kong Susan Syiem bad u Vice President ka GHDSTEA u Partha M Sangma.

Nalor kane kila pynpaw ba ha ka 21 tarik u Jylliew 2018 la dei ban pyllait noh ia ka Arrear naduh 2 snem mynshwa hynrei haduh mynta iaka 4th Installment ym pat pyllait.

“Ngi kyntu ban pynkloi noh ia ka jingpyllait ia katei ka pisa kaba 25% jong ka Arrear sha baroh ki nonghikai bad ki nongtrei ha ki Deficit School ha ka jylla” kila pynpaw.

Kila pynpaw ruh ba ki nonghikai ki mad ia ka jingeh kaba khraw namar ka jingslem ban ioh ia ka tulop bad kila kyntu iaka sorkar ba kadei ban pynthikna ban pyllait thikna iaka tulop jongki nonghikai bad ki nongtrei ha ki Deficit School ha ka jylla.

Ki nongialam ka KJDSTA bad GHDSTEA kila pynpaw ba ka sorkar kadei ban don thaw noh bad ban pyntreikam iala ka jong ka Service Rule na ka bynta ki Deficit School ha ka jylla.

Nalor kane kila ong, ba ka Fifth Pay Commission kala kdew shai ba kam shym la don satia kano kano ka bynta naka bynta ban kyntiew kyrdan na ka bynta ki nonghikai bad nongtrei ha ki Deficit School.

Kine ki nongialam kila pynpaw ruh ba ki nonghikai haba ki pang ki shitom kim ioh ia kano kano ka jingkyrshan bad kila pynpaw ruh ba namar ba la pynmih thymmai ia ki sobjek ha ki skul kumta ban pynthikna ba kan long kaba biang donkam ban thung nonghikai thymmai ha katei ka bynta.

Kine ki nonghikai kila pynpaw iaka jingshaniah ba u Myntri Rangbah yn sngewthuh lem ia ka jingeh kaba ki nonghikai ki mad bad ki ngeit skhem ba ka sorkar jylla kan shimkhia lem ban thaw ia ki lad ki lynti ban weng ia kitei ki jingeh na ka bynta ka bha ka miat jongki nonghikai bad na ka bynta ban kyntiew iaka pule puthi ha ka jylla.

Pule ruh: Dawa ka KSU ban thungkam shuwa iaki trai Jylla ha ka kam MHO bad doktor Specialist

PEIT:

Ka rynsan khubor digital ba pura ka Meghalaya da ka ktien Khasi.

Balei ban ap ia ka lashai, haba ki khubor ki mih mar syn jia!

Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!