Imphal, Nailar 17 : Haduh 10 ngut ki MLA kiba dei ki paid riewlum ka Manipur kila rai ban boycott ne sangeh leit iashim bynta ha ka Dorbar jong ka Iingdorbar Thaw Ain ka Jylla kaba buh ban sdang naduh ka 21 tarik Nailar.
“Yn ym don uwei ruh u Myntri Sorkar, ki MLA bad ki Nongialam kiba dei jong ki Kuki, Zomi bad kiwei ki jaidbynriew kiba kloi ban leit sha Imphal namar ka jingbym shngain. Kumta, kila rai ban boycott ia ka dorbar” ong u Ginza Vualzong, Nongaiktien ka Indigenous Tribal Leaders’ Forum (ITLF) haba iakren bad ki nongthoh khubor.
Ka ITLF kaba dei kawei na ki seng ba khlain bor jong ki riewlum ha Manipur, kala ong ba ka jingboycott ia kane ka Dorbar ka dei ruh kum ka dak ban pyni ia ka jingsngewlem halor ka jingshah pyniap bad shah thombor ki paid riewlum ha ki Meitei.
Naduh ka 12 tarik Jymmang, ki 10 ngut ki MLA kynthup ia 7 ngut na ka BJP kaba synshar ia ka Jylla, kila dawa ban ai noh iala ka jong ka bor synshar khadar na ka bynta ki paid riewlum.
Ha ka sngi Balang, ki MLA kila phah ia ka dorkhas sha u Myntri Rangbah Duh ka Ri Narendra Modi ba dawa ban pynkha ia ka kam Chief Secretary bad Director General of Police lane ki kam kiba iahap kyrdan na ka bynta ki 5 tylli ki hill dstrict ka Churachandpur, Kangpokpi, Chandel, Tengnoupal bad Pherzaw.
Kine ki MLA kila kynnoh ba ka Imphal kala kylla long ka lum jong ka jingiap bad jingpynjot ia ki paid Kuki Zomi bad ym don satia kiba kwah ban leit phai biang shakane ka nongbah.
Ha kajuh ka por,40 ngut ki MLA kiba don ha ka Sorkar kila phah ia ka shithi bala iasoi lang sha u Myntri Rangbah Duh ba dawa ban weng noh ia ka soskular suspension operation bad ki kynhun kaikhlaw, ban khang ia ka jingkieng atiar bad ban weng noh ia ki shipai Assam Rifles napoh ka Jylla.
Pule lang ia kane: Kular u CM ban shimkhia ka Sorkar ia ki jingeh ki nongtrei muster roll bad mid-day meal
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
